Qrim sog‘liqni saqlash vaziri Aleksandr Ostapenko Simferopoldagi COVID-19 bemorlari davolanadigan kasalxonaga borib ishlashga qaror qildi. “RBK”ning xabar berishicha, bu haqda u koronavirusning oldini olish bo‘yicha shtab yig‘ilishida ma’lum qilgan.
“Men, Sergey Valeryevich, respublikamizning tibbiyot xodimlaridan iborat 40 ming kishilik jamoamizning oddiy a’zosi, davlat xizmatchisi maqomini inobatga olgan holda koronavirus gospitali — 7-shahar kasalxonasiga borib ishlashga ixtiyoriy ravishda qaror qildim”, — degan Ostapenko.
Uning ta’kidlashicha, Qrimda pnevmoniya bilan og‘rigan bemorlarni davolash uchun tibbiyot xodimlari yetishmayapti. Vazir kasalxonadagi ishini sog‘liqni saqlash vaziri vazifalari bilan birgalikda olib boradi.
Aleksandr Ostapenko 2020-yilning sentabr oyida vazir etib tayinlangunga qadar Qrimdagi Semashko nomidagi Respublika klinik kasalxonasining bosh shifokori bo‘lgan. U 2019-yildan buyon sog‘liqni saqlash vaziri bo‘lib kelgan Igor Chemodanovning o‘rnini egallagan.
Sentabr oyi oxirida Qrim rahbari Sergey Aksenov bemorlarni kasalxonaga yotqizishdan bosh tortish bilan bog‘liq ko‘plab shikoyatlar tufayli Sog‘liqni saqlash vazirligi ishini tanqid qilgan. U, shuningdek, Qrim Sog‘liqni saqlash vazirligida shifokorlar kasalxonaga yotqizishni rad etgan pnevmoniya bilan kasallangan ikki bemorning o‘limi yuzasidan ichki tekshiruv o‘tkazilishini aytgan. Keyinchalik Aksenov Chemodanovni lavozimidan chetlatgan.
Izoh (0)