Тошкент давлат юридик университети ва Тожикистон давлат ҳуқуқ, бизнес ва сиёсат университети ўртасида қўшма факультетни ташкил этиш бўйича шартнома имзоланди. Бу ҳақда ТДЮ ахборот хизмати хабар берди.
Шартномани имзолашда икки олий таълим муассасаси раҳбарияти, масъул ходимлари ва профессор-ўқитувчилар иштирок этган.
«Zoom платформаси орқали бўлиб ўтган тадбирда Ўзбекистон олий таълим тизимини Марказий Осиёда халқаро таълим дастурларини амалга оширувчи «хаб»га айлантириш, мамлакатимизга хорижий талабалар ва инвестицияларни жалб этиш, ТДЮнинг халқаро рейтингларга киришини таъминлаш мақсадида ташкил этилган мазкур факультет университетнинг хориждаги илк факультети экани қайд этилди.
Қўшма факультетда нафақат Тожикистон Республикаси, балки бошқа хорижий мамлакатларнинг фуқаролари ҳам ўқиши мумкин. Ўқиш халқаро стандартларга мувофиқ, инглиз ва рус тилларида олиб борилади», – дейилади хабарда.
Факультетда кадрлар тайёрлаш бакалавриат босқичида «3+1» ва магистратура мутахассисликларида «1+1» икки томонлама диплом дастури доирасида амалга оширилади ҳамда битирувчи талабалар Тошкент давлат юридик университети ва Тожикистон давлат ҳуқуқ, бизнес ва сиёсат университети дипломларини қўлга киритади.
Тожикистон давлат ҳуқуқ, бизнес ва сиёсат университети Хўжанд шаҳрида жойлашган, 6 та факультет, 3 та ўқув корпуси ва 11 та ўқув лабораторияга эга. Университетда 388 нафар профессор-ўқитувчи, жумладан, 148 нафар фан номзоди ва доктори фаолият юритади.
2020 йил май ойида Тошкент давлат юридик университетида Халқаро ҳуқуқ ва қиёсий ҳуқуқшунослик факультети ташкил этилиши ҳақида хабар берилган. Сентябрда Тошкент давлат юридик университети томонидан Ғафур Ғулом номидаги махсус стипендия ҳамда кўкрак нишони таъсис этилганди.
Изоҳ (0)