“O‘zbekko‘mir” aksiyadorlik kompaniyasi budjet tashkilotlariga ko‘mir yetkazib berish rejasini muddatidan oldin bajardi. Bu haqda kompaniya matbuot xizmatiga tayanib, “Gazeta.uz” xabar berdi.
26-oktabr holatiga ko‘ra budjet sohalari ehtiyojlari uchun 405 ming 400 tonna qattiq yoqilg‘i yetkazib berilgan — kompaniya ushbu miqdordagi ko‘mirni 1-noyabrgacha yetkazib berishi rejalashtirilgan edi.
Ta’kidlanishicha, 2020-yil davomida budjet tashkilotlarini ko‘mir bilan ta’minlash hajmi 2019-yilning shu davriga nisbatan 18,3 foizga oshgan.
Ko‘mirning katta qismi Andijon va Farg‘ona viloyatlari uchun zarur bo‘lgan. Kompaniya viloyatlar bo‘yicha yetkazib berilgan ko‘mir hajmi haqida ma’lumot berishni rad etgan.
Ko‘mir ta’minotining ko‘payishi tabiiy gaz qazib olinishi pasayishi oqibatida sodir bo‘lmoqda. Davlat statistika qo‘mitasi ma’lumotlariga ko‘ra, yilning o‘tgan to‘qqiz oyida gaz qazib chiqarish deyarli 20 foizga kamaygan, ya’ni 44,8 milliarddan 36 milliard kubometrgacha. Gaz kondensati esa 35 foizga yoki 1,5 million tonnadan 1 million tonnagacha, ko‘mir — 3 foizga, ya’ni 2,7 milliondan 2,6 million tonnagacha kamaygan.
Bundan tashqari, agar 2019-yil yanvar—sentabr oylarida O‘zbekiston tabiiy gaz eksportidan 2 milliard dollardan ortiq daromad olgan bo‘lsa, bu yil u 5,5 baravar kam yoki 366,3 million dollarni tashkil etadi. Bunga sabab koronavirus pandemiyasi tufayli O‘zbekistonda ishlab chiqarilgan gazni Xitoyga eksport qilish bir necha baravar kamaygan, Rossiyaga esa butunlay to‘xtagan.
Avvalroq “Hududgazta’minot” korxonasi vakili Abdusattor Qayumov yangi qurilayotgan ko‘p qavatli uylarda markazlashtirilgan isitish tizimi o‘rniga mahalliy isitish tizimi o‘rnatilayotgani, bu esa ko‘p gaz sarflanishiga olib kelib, gaz eksportining kamayishi ichki bozorga gaz yetkazib berishni ko‘paytirishga yordam bermayotganini aytgandi.
Izoh (0)