O‘zbekiston Mahalla va oilani qo‘llab-quvvatlash vazirligi va Koreyaning Xalqaro hamkorlik agentligi (KOICA) 23-oktabr kuni Sirdaryo viloyatining ehtiyojmand aholisini qo‘llab-quvvatlash dasturini amalga oshirish to‘g‘risida memorandum imzoladi. Dasturning umumiy budjeti 500 ming dollarni tashkil qiladi, deb xabar bermoqda agentlik matbuot xizmatiga tayanib “Gazeta.uz”.
Viloyatning Sardoba, Oqoltin va Mirzaobod tumanlarida mahallalar aholisini kasb-hunarga o‘rgatish uchun uchta muassasa tashkil etiladi. Ushbu muassasalarda mutaxassis va psixologlar aholining ehtiyojmand qatlami muammolarini o‘rganadi hamda ularga bepul yordam beradi.
Bundan tashqari, tabiiy ofatdan zarar ko‘rgan 300 kishi kompyuter savodxonligi va oshpazlik kurslarida o‘qitiladi.
Respublika ijtimoiy axborot markazining Istiqbolli avlod mintaqaviy filiali loyihani birgalikda amalga oshirish uchun tanlab olindi. Ular markaz bilan birgalikda dasturning ikkinchi komponenti – 10 mingta antiseptik vositalarini aholiga yetkazib berish, mahalla xodimlarining malakasini oshirish va aholi bilan ijtimoiy ishlarni olib borish bo‘yicha treninglar tashkil etilishini ta’minlaydi.
Mavzuga doir:
- Mehnat vazirligi Samarqand viloyati hokimining ayollarni oqsochlikka o‘qitish haqidagi fikriga munosabat bildirdi
- Shavkat Mirziyoyev O‘zbekistonda “yoshlar daftari” va “ayollar daftari”ni shakllantirish bo‘yicha vazifalarni belgilab berdi
- Toshloq va Olot tumanini ijtimoiy-iqtisodiy rivojlantirish dasturi qabul qilindi
Izoh (0)