Qirg‘izistonning sobiq prezidenti Almazbek Atambayev Bishkekdagi 1-sonli tergov izolyatoriga joylashtirilgan. Bu haqda uning advokati Zamir Jooshevga tayanib, “24.kg” xabar berdi.
Advokatning so‘zlariga ko‘ra, sobiq davlat rahbari yer ostidagi kamerada saqlanmoqda. Bu joyda avval o‘lim jazosiga hukm qilinganlar saqlangan.
“Bu kamerada bugun issiqlik ta’minoti yoqildi. U yerda kanalizatsiya ishlamaydi, eshiklar doimiy ochiq. Almazbek Atambayev ochlik e’lon qildi”, — deya ma’lum qilgan Zamir Jooshev.
Eslatib o‘tamiz, Almazbek Atambayev 2020-yilning iyun oyida 11 yillik qamoq jazosiga hukm qilingandi. U Qirg‘iziston Milliy xavfsizlik davlat qo‘mitasining tergov izolyatorida saqlanayotgan edi. Bishkekda 5-oktabrdan 6-oktabrga o‘tar kechasi yuz bergan tartibsizliklar chog‘ida Atambayev ozod qilindi. U 9-oktabr kuni Bishkekdagi namoyishlar bo‘layotgan markaziy maydonga chiqdi, 10-oktabr kuni esa tartibsizliklar tashkil qilish aybi bilan yana qo‘lga olindi.
Izoh (0)