Қирғизистоннинг собиқ президенти Алмазбек Атамбаев Бишкекдаги 1-сонли тергов изоляторига жойлаштирилган. Бу ҳақда унинг адвокати Замир Жоошевга таяниб, «24.kg» хабар берди.
Адвокатнинг сўзларига кўра, собиқ давлат раҳбари ер остидаги камерада сақланмоқда. Бу жойда аввал ўлим жазосига ҳукм қилинганлар сақланган.
«Бу камерада бугун иссиқлик таъминоти ёқилди. У ерда канализация ишламайди, эшиклар доимий очиқ. Алмазбек Атамбаев очлик эълон қилди», — дея маълум қилган Замир Жоошев.
Эслатиб ўтамиз, Алмазбек Атамбаев 2020 йилнинг июнь ойида 11 йиллик қамоқ жазосига ҳукм қилинганди. У Қирғизистон Миллий хавфсизлик давлат қўмитасининг тергов изоляторида сақланаётган эди. Бишкекда 5 октябрдан 6 октябрга ўтар кечаси юз берган тартибсизликлар чоғида Атамбаев озод қилинди. У 9 октябрь куни Бишкекдаги намойишлар бўлаётган марказий майдонга чиқди, 10 октябрь куни эса тартибсизликлар ташкил қилиш айби билан яна қўлга олинди.
Изоҳ (0)