Rossiyada pandemiya boshidan buyon 91 nafar deputatlar COVID-19 ga chalingan. Meduza’ning xabar berishicha, bu haqda Rossiya Dumasi spikeri Vyacheslav Volodin prezident Vladimir Putin bilan uchrashuvda ma’lum qilgan.
Volodinning so‘zlariga ko‘ra, ayni paytda deputatlarning 38 nafari kasal, ulardan biri jonlantirish bo‘limida yotibdi. Spiker, shuningdek, deputatlardan biri koronavirusdan vafot etganini ham eslatib o‘tgan.
Vyacheslav Volodinning ta’kidlashicha, Duma karantinga keta olmaydi yoki ko‘plab Yevropa parlamentlari kabi yig‘ilishlarning butunlay onlayn shakliga o‘ta olmaydi. Chunki Dumadagilar prezident har kuni vaziyatni nazorat qilib turishini, deputatlar o‘z navbatida hisobot berib turishlari kerakligini tushunadi.
Shu bilan birga, qo‘mitalarning alohida yig‘ilishlari keyinchalik bari bir onlayn formatga o‘tkazilishi mumkinligini aytgan.
Rossiya Dumasida jami 450 nafar deputat bor.
Eslatib o‘tamiz, mamlakatda 26-oktabr holatiga ko‘ra, koronavirusga chalinish bo‘yicha 17 347 ta yangi holat qayd etilib, kasallanganlarning umumiy soni 1 531 224 nafarga yetdi.
Rossiyada jami kasallanganlar soni 1,5 milliondan oshganiga qaramay hukumat mamlakatda koronavirus tarqalishi tufayli qat’iy cheklovlarni joriy qilishni rejalashtirmayapti. “Rospotrebnadzor” rahbari Anna Popova Rossiyada kasallanishning ortishini yilning sovuq mavsumi boshlangani bilan bog‘lagan. Shuningdek, bunga ta’sir qiluvchi omillar qatoriga fuqarolarning ta’tildan va ishga qaytganligini kiritgan.
“Rospotrebnadzor” Epidemiologiya markaziy ilmiy-tadqiqot instituti direktorining tadqiqot ishlari bo‘yicha o‘rinbosari Aleksandr Gorelov Rossiyada mart oyigacha koronavirus bilan kasallanishlar soni kamayishini taxmin qilgan. Gamaleya nomidagi Milliy epidemiologiya va mikrobiologiya ilmiy-tadqiqot markazining yashirin infeksiyalar mikrobiologiyasi bo‘limining sobiq rahbari, professor, virusolog Viktor Zuyev esa mamlakatda epidemiologik vaziyat 2021-yil yozida barqarorlashadi, degan fikrda.
Izoh (0)