“Aholi bandligi to‘g‘risida”gi O‘zbekiston Respublikasi qonuni e’lon qilindi, deya xabar bermoqda “Kun.uz”.
Ushbu qonun 1998-yil 1-mayda qabul qilingan “Aholini ish bilan ta’minlash to‘g‘risida”gi qonunning o‘rnini bosadi.
Yangi qonun bilan respublikada ishsizlik nafaqasi miqdori quyidagicha oshiriladi:
- ishdan va ish haqidan so‘nggi 12 oylik davr ichida mahrum bo‘lgan shaxslarga – avvalgi ish joyidagi o‘rtacha oylik ish haqining 50 foizi miqdorida, lekin mehnatga haq to‘lashning eng kam miqdori (679 330 so‘m)dan oz bo‘lmagan miqdorda (taqqoslash uchun, amaldagisi MHEKMning 35,2 foizidan oz bo‘lmagan miqdorda);
- ishdan va ish haqidan mahrum bo‘lgan hamda uzoq (12 oydan ortiq) tanaffusdan keyin mehnat faoliyatini qayta boshlashga harakat qilayotgan shaxslarga – MHEKMning 1 baravari miqdorida (taqqoslash uchun, amaldagisi MHEKMning 26,5 va 35,2 foizidan oz bo‘lmagan miqdorlarda);
- ilgari ishlamagan, birinchi marta ish qidirayotgan shaxslarga – MHEKMning kamida 75 foizi miqdorida (taqqoslash uchun, amaldagisi MHEKMning kamida 26,5 foizi miqdorida).
“Aholi bandligi to‘g‘risida”gi qonunda aks etgan yangi tushunchalardan biri autstaffing bo‘lib, u ish beruvchi tomonidan o‘z xodimlarini ularning roziligi bilan boshqa yuridik shaxslarga ushbu xodimlar tomonidan ish beruvchi va uning xodimi o‘rtasida tuzilgan mehnat shartnomalarida, shuningdek jamoa kelishuvlarida belgilangan mehnat vazifalarini bajarish uchun vaqtinchalik yuborish yo‘li bilan ko‘rsatiladigan xizmatlar turi hisoblanadi.
Qonunda “Yagona milliy mehnat tizimi” idoralararo dasturiy-apparat kompleksini joriy etish belgilangan bo‘lib, ushbu tizim ish beruvchilar va xodimlar o‘rtasidagi mehnat munosabatlarini, shu jumladan mehnat shartnomalarini tuzish, mehnat shartnomalariga o‘zgartish va qo‘shimchalar kiritish, ularni bekor qilish tartib-taomillarini elektron ro‘yxatdan o‘tkazish kabi bir qator vazifalarni amalga oshirishni ta’minlaydi.
Hujjatda O‘zbekistondan tashqaridagi mehnat faoliyatiga oid quyidagi masalalar ham belgilangan:
- Fuqarolarning O‘zbekistondan tashqaridagi mehnat faoliyatiga doir huquqlari;
- Tashqi mehnat migratsiyasi agentligi tomonidan fuqarolarga O‘zbekistondan tashqarida ishga joylashtirish uchun ko‘rsatiladigan xizmatlar;
- Yuridik shaxslarning O‘zbekiston Respublikasidan tashqariga chiqib ketayotgan fuqarolarni ishga joylashtirish va ularning kasbiy bilimini tasdiqlash bo‘yicha faoliyati;
- Fuqarolarni O‘zbekistondan tashqarida vaqtinchalik mehnat faoliyatini amalga oshirish uchun uyushgan holda ishga qabul qilish;
- O‘zbekistondan tashqarida vaqtinchalik mehnat faoliyatini amalga oshirayotgan fuqarolarning huquqlari, erkinliklari va qonuniy manfaatlarini himoya qilish;
- O‘zbekistondan tashqarida vaqtinchalik mehnat faoliyatini amalga oshirganidan so‘ng qaytgan fuqarolarni ishga joylashtirishga ko‘maklashish.
Avvalroq O‘zbekistonda nogironligi bo‘lgan shaxslarning huquq va erkinliklari to‘g‘risidagi qonun e’lon qilingani xabar qilingandi.
Izoh (0)