«Аҳоли бандлиги тўғрисида»ги Ўзбекистон Республикаси қонуни эълон қилинди, дея хабар бермоқда «Kun.uz».
Ушбу қонун 1998 йил 1 майда қабул қилинган «Аҳолини иш билан таъминлаш тўғрисида»ги қонуннинг ўрнини босади.
Янги қонун билан республикада ишсизлик нафақаси миқдори қуйидагича оширилади:
- ишдан ва иш ҳақидан сўнгги 12 ойлик давр ичида маҳрум бўлган шахсларга – аввалги иш жойидаги ўртача ойлик иш ҳақининг 50 фоизи миқдорида, лекин меҳнатга ҳақ тўлашнинг энг кам миқдори (679 330 сўм)дан оз бўлмаган миқдорда (таққослаш учун, амалдагиси МҲЕКМнинг 35,2 фоизидан оз бўлмаган миқдорда);
- ишдан ва иш ҳақидан маҳрум бўлган ҳамда узоқ (12 ойдан ортиқ) танаффусдан кейин меҳнат фаолиятини қайта бошлашга ҳаракат қилаётган шахсларга – МҲЕКМнинг 1 баравари миқдорида (таққослаш учун, амалдагиси МҲЕКМнинг 26,5 ва 35,2 фоизидан оз бўлмаган миқдорларда);
- илгари ишламаган, биринчи марта иш қидираётган шахсларга – МҲЕКМнинг камида 75 фоизи миқдорида (таққослаш учун, амалдагиси МҲЕКМнинг камида 26,5 фоизи миқдорида).
«Аҳоли бандлиги тўғрисида»ги қонунда акс этган янги тушунчалардан бири аутстаффинг бўлиб, у иш берувчи томонидан ўз ходимларини уларнинг розилиги билан бошқа юридик шахсларга ушбу ходимлар томонидан иш берувчи ва унинг ходими ўртасида тузилган меҳнат шартномаларида, шунингдек жамоа келишувларида белгиланган меҳнат вазифаларини бажариш учун вақтинчалик юбориш йўли билан кўрсатиладиган хизматлар тури ҳисобланади.
Қонунда «Ягона миллий меҳнат тизими» идоралараро дастурий-аппарат комплексини жорий этиш белгиланган бўлиб, ушбу тизим иш берувчилар ва ходимлар ўртасидаги меҳнат муносабатларини, шу жумладан меҳнат шартномаларини тузиш, меҳнат шартномаларига ўзгартиш ва қўшимчалар киритиш, уларни бекор қилиш тартиб-таомилларини электрон рўйхатдан ўтказиш каби бир қатор вазифаларни амалга оширишни таъминлайди.
Ҳужжатда Ўзбекистондан ташқаридаги меҳнат фаолиятига оид қуйидаги масалалар ҳам белгиланган:
- Фуқароларнинг Ўзбекистондан ташқаридаги меҳнат фаолиятига доир ҳуқуқлари;
- Ташқи меҳнат миграцияси агентлиги томонидан фуқароларга Ўзбекистондан ташқарида ишга жойлаштириш учун кўрсатиладиган хизматлар;
- Юридик шахсларнинг Ўзбекистон Республикасидан ташқарига чиқиб кетаётган фуқароларни ишга жойлаштириш ва уларнинг касбий билимини тасдиқлаш бўйича фаолияти;
- Фуқароларни Ўзбекистондан ташқарида вақтинчалик меҳнат фаолиятини амалга ошириш учун уюшган ҳолда ишга қабул қилиш;
- Ўзбекистондан ташқарида вақтинчалик меҳнат фаолиятини амалга ошираётган фуқароларнинг ҳуқуқлари, эркинликлари ва қонуний манфаатларини ҳимоя қилиш;
- Ўзбекистондан ташқарида вақтинчалик меҳнат фаолиятини амалга оширганидан сўнг қайтган фуқароларни ишга жойлаштиришга кўмаклашиш.
Аввалроқ Ўзбекистонда ногиронлиги бўлган шахсларнинг ҳуқуқ ва эркинликлари тўғрисидаги қонун эълон қилингани хабар қилинганди.
Изоҳ (0)