Muddatli harbiy xizmatni o‘tab, qo‘mondonlik tavsiyanomasini olgan bo‘lsa-da, OTMga kirish imtihonlarida bu imtiyozlari hisobga olinmagan abituriyentlar 22-oktabr kuni yana Davlat test markazi oldiga yig‘ildi, deb xabar beradi “Kun.uz”.
Ma’lumotlarga ko‘ra, abituriyentlar ushbu masalaga Vazirlar Mahkamasi e’tibor qaratishini talab qilmoqda. Turli viloyatlardan Toshkentga kelgan fuqarolar bilan bu gal Yoshlar ijod saroyi anjumanlar zalida uchrashuv tashkil qilingan.
Uchrashuvda mas’ullardan Davlat test markazi direktori o‘rinbosari Sardor Rajabov, Davlat test markazi direktori boshqarma boshlig‘i Diyorbek Qo‘chqorov, Davlat qabul komissiyasi mas’ul kotibi Shohrux Daliyev va boshqalar ishtirok etdi.
Muammo shundaki, 1800 abituriyentning harbiy tavsiyanoma imtiyozi OTMlarga kirish imtihoni uchun tasdiqlanmay qolgan va ular umumiy kvotadan tashqari 5 foizlik kvotaga kiritilmagan.
Norozilik bildirayotgan abituriyentlarning aksari o‘zi hujjat topshirgan OTMlarning “harbiylar uchun o‘tish balli”dan yuqoriroq ball to‘plagani, shunga qaramay talabalikka qabul qilinmaganini aytmoqda.
Ular oktabr oyining dastlabki haftasida ham DTM binosi oldida to‘planishgandi. Ammo o‘shanda aytilgan muddatda natijalar e’lon qilinmadi.
22-oktabrdagi uchrashuvda DTM direktori o‘rinbosari Sardor Rajabov murojaatlar ko‘rib chiqilayotgani, 1800 dan ortiq abituriyentning har biriga tegishli hujjatni o‘rganish vaqt talab qilishini ta’kidlagan.
Rajabovning aytishicha, shu kunga qadar 600 dan ortiq murojaat ko‘rib chiqilib, bazaga joylangan. Hamma murojaat o‘rganib bo‘lingach, e’lon qilinishi kutilmoqda.
Qator murojaatchilar shu masala sababli o‘z viloyatlaridan bir necha marta poytaxtga kelishga majbur bo‘lishayotgani, ayrimlari yo‘lkiraning o‘ziga 2 million so‘m sarflaganini aytishgan. Ular mutasaddilardan natijalarni shu kunning o‘zida e’lon qilishni so‘rashmoqda.
Davlat qabul komissiyasi mas’ul kotibi Shohrux Daliyev muammo 24-oktabr kunigacha hal qilinishi, har bir murojaatchi telefon orqali xabardor qilinishini ma’lum qilib, abituriyentlardan shu muddatgacha sabr bilan kutishlarini so‘ragan.
“Bugungi pandemiya paytida yo‘lkiraga pul sarflash osonmasligini bilaman. Shuning uchun har bir abituriyentga o‘zimiz xabar beramiz. Shaxsan o‘zim boraman Davlat test markaziga”, – dedi Davlat komissiyasi mas’ul kotibi.
Shu kuni abituriyentlar bilan muloqotda bo‘lgan DTM direktori Majid Karimov ham masala “uzog‘i 3-4 kunda” hal bo‘lishini aytgan.
“Agar ballingiz tortilgan chiziqdan tepada bo‘lsa, hammangiz talaba bo‘lasiz. Qabul komissiyasi raisining shaxsan o‘zi (Abdulla Aripov – tahr.) qo‘shimcha kvota berilishini va harbiy imtiyozi tasdiqlanadiganlarning talabalikka qabul qilinishini aytgan. Bundan oldin talaba bo‘lganlar ham chiziqdan pastga tushib ketmaydi”, – dedi Majid Karimov.
Eslatib o‘tamiz, 5-oktabr kuni Toshkent shahridagi Davlat test markazi binosiga harbiy tavsiyanomasi bo‘la turib, lekin imtiyoz qo‘llanilmagan abituriyentlar to‘plangani xabar qilingandi. Unda bir qancha abituriyentlar va ularning ota-onalari ushbu vaziyat bo‘yicha DTMdan izoh talab qilib, bu masalani hal qilishni talab qilishgan. Lekin DTM vakili bu muammoni hal qilish markazning vakolati doirasida emasligini bildirib o‘tgan edi. Keyinroq DTM harbiy tavsiyanomalari bo‘lgan murojaatchilar ro‘yxati qayta ko‘rib chiqilishini bildirgan.
Avvalroq O‘zbekiston OTMlariga kirish imtihonlarida 189 ball to‘plab, kontraktga kirgan abituriyentlarning natijalari qayta hisoblanib, ular budjetga kirgani haqida xabar berilgandi.
Izoh (0)