Singapurda odamda COVID-19 bor yoki yo‘qligini bir necha daqiqada aniqlab beradigan yangi test yaratildi, deb xabar bermoqda “RBK” The Straits Times’ga tayanib. Ixtiro Singapur milliy universiteti (NUS)ga qarashli Breathonix kompaniyasiga tegishli.
Dastlabki klinik sinovlarda Singapur Milliy yuqumli kasalliklar markazining 180 nafar bemori ishtirok etgan. Tadqiqotning aniqlik darajasi 90 foiz atrofida bo‘lgan. Tadqiqotchilar yana 600 nafar ko‘ngillida testni sinab ko‘rmoqchi.
Breathtonix testi shilliq qavatdan surtma olish talab etiluvchi an’anaviy PZR-testidan farqli ravishda odam nafasining kimyoviy tarkibidagi o‘zgarishlarni qayd etadi.
Ta’kidlanishicha, har bir nafasda hujayralardagi biokimyoviy reaksiyalar natijasida hosil bo‘ladigan uchuvchi organik birikmalar deb nomlanadigan ko‘rinmas zarralar mavjud. Breathtonix ijrochi direktori Szya Chjunanning so‘zlariga ko‘ra, uchuvchi organik birikmalarni COVID-19 kabi kasalliklar markeriga kiritish mumkin.
Szya Chjunanning aytishicha, bunday testerdan foydalanish uchun xodim maxsus o‘qitilgan bo‘lishi talab etilmaydi. “Natijalar real vaqtda chiqarib beriladi”, — degan u va diagnostika odam eng gavjum bo‘ladigan joylarda, masalan, aeroportlarda o‘tkazilishi mumkinligini qo‘shimcha qilgan.
Singapur Milliy yuqumli kasalliklar markazida aytilishicha, Breathonix ixtirosi skrining testi bo‘lib xizmat qilishi mumkin, aniqroq natija uchun esa PZR-testi kerak bo‘lishi mumkin.
Izoh (0)