Italiyada koronavirus epidemiyasi boshlanganidan beri kasallanishlarning sutkalik ko‘rsatkichi 15 mingtadan oshdi. Bu haqda mamlakat Sog‘liqni saqlash vazirligi axborotiga tayanib, “RIA Novosti” xabar qildi.
Bir sutka ichida mamlakatda 15 199 kishida koronavirus infeksiyasi aniqlandi. Avvalgi antirekord 18-oktabrda qayd etilgan va shu kuni 11 705 ta yangi kasallanish holati kuzatilgandi. Bahorda kasallanishlar soni bo‘yicha antirekord 21-martda kuzatilgan va shu kuni 6557 kishida koronavirus infeksiyasi borligi aniqlangandi.
Italiya Sog‘liqni saqlash vazirligi taqdim etgan ma’lumotlarga ko‘ra mamlakatda epidemiya boshlanganidan beri koronavirus yuqtirib olganlar soni 449 648 nafarga yetgan. Eng yuqori to‘lqin Lombardiya provinsiyasida kuzatilgan, u yerda 4,1 mingtadan ziyod kasallanish holatlari qayd etilgan. Hududda 21-oktabrdan boshlab komendantlik soati joriy qilingan.
Italiyada infeksiya asoratlari oqibatida oxirgi bir sutka davomida 127 kishi vafot etgan va koronavirus qurbonlarining umumiy soni 36 832 nafarga yetgan. Bir kun avval 89 kishi COVID-19 asoratlari tufayli olamdan ko‘z yumgandi.
Mamlakatda 21-oktabr holatiga bir sutka davomida kasallikdan tuzalganlar soni 2369 nafarga ko‘paygan va sog‘ayganlarning umumiy soni 257 374 nafarga yetgan. Kasalliklardagi bemorlar soni 9 ming nafardan (603 kishi qo‘shildi) oshgan, intensiv terapiya bo‘linmalarida esa jami 926 nafar bemor (56 nafar qo‘shilgan) davolanmoqda.
Yevropada koronavirus pandemiyasining ikkinchi to‘lqini sabab qayta lokdaun e’lon qilgan birinchi davlat Irlandiya bo‘lgan. Irlandiyada odamlarga 21-oktabrdan 1-dekabrgacha zarurat bo‘lmagan holatlarda o‘z uylaridan 5 kilometr masofadan uzoqda bo‘lish taqiqlab qo‘yilgan.
Shuningdek, Sloveniya, Uels kabi davlatlarda ham koronavirus tarqalishining ikkinchi to‘lqini tufayli karantin cheklovlari qat’iylashgan.
Izoh (0)