Toshkent shahrida 19-oktabrdan boshlab jamoat transporti yo‘lovchilarning tibbiy niqob va qo‘lqopda bo‘lish tartibi joriy etilganidan keyin ijtimoiy tarmoqlarda ishlatilgan qo‘lqoplar bilan to‘lgan chiqindi idishlari va ular bilan ifloslangan yerosti piyodalar yo‘laklarining holati aks etgan suratlar tarqaldi va muhokamalarga sabab bo‘ldi. Xususan, shunday holatlar metro bekatlarining chiqish joylarida ham kuzatildi. Toshkent metropoliteni mazkur holatga o‘z munosabatini bildirdi.
Ma’lum qilinishicha, mavjud vaziyatni hisobga olgan holda metropoliten ma’muriyati zudlik bilan korxonaning tozalash ishlari jadvalini qayta ko‘rib chiqdi. Ishlatilgan qo‘lqoplar uchun qo‘shimcha chiqindi idishlari o‘rnatilishi va keyinchalik bu ishlatilgan qo‘lqoplar utilizatsiya qilinishi nazoratga olinadi.
“Toshkent metropoliteni ma’muriyati ushbu muammoga e’tibor qaratgan, befarq bo‘lmagan yurtdoshlarimizga o‘z minnatdorchiligini bildiradi. Shu fursatdan foydalangan holda barcha yo‘lovchilardan tozalik qoidalariga rioya qilishni so‘rab qoladi. Shuningdek, metropoliten xodimlarining mehnatini qadrlagan holda ishlatilgan qo‘lqoplarni chiqindi tashlash uchun mo‘ljallangan idishlarga tashlashni iltimos qiladi”, — deyiladi Toshkent metropoliteni xabarida.
Eslatib o‘tamiz, turli yuqumli mavsumiy infeksiyalar tarqalishining oldini olish va yo‘lovchilar salomatligini asrash maqsadida 19-oktabrdan boshlab Toshkent shahar jamoat transporti (avtobus, metro, yo‘nalishli taksi) xizmatidan foydalanganda yo‘lovchilarning tibbiy niqob va qo‘lqopda bo‘lish tartibi joriy etildi, mazkur shaxsiy himoya vositalari yo‘lovchilarga bepul tarqatilmoqda.
Izoh (0)