Futbol bo‘yicha Fransiya chempionatining ikkinchi divizioni doirasida o‘tkazilgan “Valensyen” va “Sosho” (0:0) klublari o‘rtasidagi uchrashuvda g‘ayrioddiy hodisa yuz berdi. Final hushtagidan so‘ng ikkala jamoa futbolchilari o‘rtasida nizo kelib chiqdi.
Kelishmovchiliklar vaqtida “Sosho” yarim himoyachisi Usseynu Tiune mezbonlar darvozaboni Jerom Priorning yoniga kelib, uning qulog‘iga nimadir deb pichirladi. Bu vaqtda esa darvozabon raqibini kuch bilan itarib yuborib, yonoqlaridagi qonli izni ko‘rsatib, Usseynu uni tishlaganidan shikoyat qila boshladi.
Uchrashuvda umumiy hisobda 44 ta fol qayd etildi va jamoalar murosa yo‘lini tanladi.
Ma’lumot uchun, “Sosho” 7-turdan keyin 13 ochko bilan Liga 2 turnir jadvalida 3-o‘rinda bormoqda, “Valensyen” esa (10 ochko) 8-pog‘onadan joy olgan.
Eslatib o‘tamiz, dunyo futboliga raqib futbolchisini tishlab olish holati begona emas. Ulardan eng mashhuri esa Luis Suares bilan bog‘liq. Urugvaylik hujumchi 2014-yilgi mundial bahslarida Italiyaga qarshi o‘yinda raqib himoyachisi Jorjio Kyellinining yelkasidan tishlab olgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)