Футбол бўйича Франция чемпионатининг иккинчи дивизиони доирасида ўтказилган «Валенсен» ва «Сошо» (0:0) клублари ўртасидаги учрашувда ғайриоддий ҳодиса юз берди. Финал ҳуштагидан сўнг иккала жамоа футболчилари ўртасида низо келиб чиқди.
Келишмовчиликлар вақтида «Сошо» ярим ҳимоячиси Уссейну Тиуне мезбонлар дарвозабони Жером Приорнинг ёнига келиб, унинг қулоғига нимадир деб пичирлади. Бу вақтда эса дарвозабон рақибини куч билан итариб юбориб, ёноқларидаги қонли изни кўрсатиб, Уссейну уни тишлаганидан шикоят қила бошлади.
Учрашувда умумий ҳисобда 44 та фол қайд этилди ва жамоалар муроса йўлини танлади.
Маълумот учун, «Сошо» 7-турдан кейин 13 очко билан Лига 2 турнир жадвалида 3-ўринда бормоқда, «Валенсен» эса (10 очко) 8-поғонадан жой олган.
Эслатиб ўтамиз, дунё футболига рақиб футболчисини тишлаб олиш ҳолати бегона эмас. Улардан энг машҳури эса Луис Суарес билан боғлиқ. Уругвайлик ҳужумчи 2014 йилги мундиал баҳсларида Италияга қарши ўйинда рақиб ҳимоячиси Жоржио Кьеллинининг елкасидан тишлаб олганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)