Yashnobod tumanidagi Bolalar milliy tibbiyot markazi hududini obodonlashtirish va ko‘kalamzorlashtirish bilan shug‘ullangan Green Zone of World qo‘shma korxonasi o‘z xizmati uchun O‘zbekiston Sog‘liqni saqlash vazirligidan 4,5 milliard so‘m oladi. Bu haqda Davlat xaridlari portalida va 28-sentabrdagi shartnomada keltirilgan, deb xabar beradi “Gazeta.uz”.
Mazkur tibbiyot markazi 20-may kuni ochilgan va shu kunning o‘zida u yerda prezident Shavkat Mirziyoyev tashrif buyurgan edi. Loyihaning umumiy qiymati 130 million dollarni tashkil etib, markaz “Baum” korporatsiyasining loyihasi asosida, Janubiy Koreya ko‘magida qurilgan.
Green Zone of World’ning ishi 29 ming kvadrat metr hududni ko‘kalamzorlashtirish va obodonlashtirishdan, xususan, 522 ta daraxt, 15,1 mingdan ortiq buta, 12 mingta mavsumiy gullar ekish va 28,8 ming kvadrat metrga gazon yotqizishdan iborat bo‘lgan.
Korxonalar va tashkilotlarning yagona davlat registri ma’lumotlariga ko‘ra, 400 million so‘m ustav kapitaliga ega Green Zone of World 2019-yilning 15-mayida ro‘yxatdan o‘tkazilgan. Kompaniya ko‘p yillik ekinlarni yetishtirish bilan shug‘ullanadi. Uning rahbari sifati Abdulla Zakirov, muassisi esa — AKCAN SAVAS va Sanjar Ummatov (ulushi 50 foizdan) deya ko‘rsatilgan.
Sanjar Ummatov Toshkent shahri obodonlashtirish boshqarmasi boshlig‘i hisoblanadi. U mazkur holat bo‘yicha yo‘llangan so‘rovga izoh bermagan.
Hujjatlarda ta’kidlanishicha, Green Zone of World Sog‘liqni saqlash vazirligiga qarshi sud da’vosini kiritgan. Unda kompaniya Sog‘liqni saqlash vazirligi ko‘rsatmasi va Bolalar milliy tibbiyot markazimi rejalashtirilgan vaqtda topshirish uchun 4,5 milliard so‘mlik ishlarni amalga oshirgani qayd etilgan. Vazirlik esa amalga oshirilgan ishni moliyalashtirmagani sabab korxona da’vo bilan Toshkent tumanlararo iqtisodiy sudiga murojaat qilgan.
Sudning 20-maydagi qarori bilan nizo mavzusi bo‘yicha mustaqil talablarni talab qilish uchun Moliya vazirligi va G‘aznachilik boshqarmasi uchinchi shaxs sifatida ishga jalb qilingan.
Sud jarayoni vaqtida da’vogarning vakili shikoyatda keltirilgan arzlarni qo‘llab-quvvatlagan va Bolalar milliy tibbiyot markazining ochilishi 19-martga rejalashtirilgani va kompaniya uni o‘z vaqtida bajarish uchun Sog‘liqni saqlash vazirligining og‘zaki ko‘rsatmasiga binoan 4,5 milliard so‘mlik ishlarni amalga oshirganini ma’lum qilgan.
Sog‘liqni saqlash vazirligi vakili da’vogarning vajlariga e’tiroz bildirmagan va tadbirkor rostdan ham ishlarni shartnoma tuzmasdan amalga oshirganini tasdiqlagan. Da’vogarning da’vosida keltirilgan ish hajmi bajarilgan, biroq moliyalashtirishning yo‘qligi sabab shartnoma o‘z vaqtida tuzilmagan.
Ishni ko‘rib chiqqan sud 5-iyun kuni kompaniyaning da’vosini ijobiy hal etgan va Sog‘liqni saqlash vazirligiga amalga oshirilgan ishlar bo‘yicha Green Zone of World bilan shartnoma imzolash majburiyatini yuklagan. Moliyalashtirish jadvaliga ko‘ra, vazirlik sentabrda 675 million so‘m to‘lagan, oktabrda kompaniya yana 1,8 milliard so‘m, noyabrda ham 1,8 milliard so‘m o‘tkazishni rejalashtirilmoqda. Qolgan 191,2 million so‘m 2021-yilda o‘tkaziladi.
Izoh (0)