Toshkentda jamoat transporti yo‘lovchilariga tarqatilayotgan bepul qo‘lqop xarajatlari davlat tomonidan qoplanadi

Turli yuqumli mavsumiy infeksiyalar tarqalishining oldini olish va yo‘lovchilar salomatligini asrash maqsadida 19-oktabrdan boshlab Toshkent shahar jamoat transporti (avtobus, metro, yo‘nalishli taksi) xizmatidan foydalanganda yo‘lovchilarning tibbiy niqob va qo‘lqopda bo‘lish tartibi joriy etilishi, ular yo‘lovchilarga bepul taqdim etilishi xabar berilgandi.

Toshkent shahar transport boshqarmasi boshlig‘i Anvar Jo‘rayev jamoat transportida yo‘lovchilarga tarqatiladigan tibbiy qo‘lqoplar kimning hisobidan xarid qilinishiga aniqlik kiritdi.

“Qo‘lqoplar yo‘lovchilar hisobidan emas, transport korxonalari tomonidan sotib olinmoqda. Har bir qo‘lqop 56 so‘mga aylanmoqda. Yo‘lkira 1400 so‘m bo‘lsa, qo‘lqop bu summaning bor-yo‘g‘i 4 foizini tashkil etmoqda. Buni metropoliten hamda ‘Toshshahartransxizmat’ korxonalarining moliyaviy xo‘jalik ishi oy yakuni bo‘yicha u yerga ketgan xarajatlar davlat tomonidan qoplab beriladi”, — degan Anvar Jo‘rayev AOKAda “Jamoat transportida tibbiy qo‘lqop kiyish tartibining joriy qilinishi” mavzusi bo‘yicha o‘tkazilgan brifingda.

Shuningdek, jamoat transportida tibbiy qo‘lqop taqishning majburiy qilinishiga nima sabab bo‘lganiga ham to‘xtalib o‘tgan.

Uning aytishicha, bugungi kunda Toshkent shahrida 129 ta yo‘nalishda mingdan ortiq avtobus yo‘nalishga chiqyapti. Avtobuslarda tashilayotgan yo‘lovchilar soni 300 mingta, metropolitenda 130 mingtani tashkil qiladi.

“Yo‘lovchilar koronavirusni yuqtirib olish xavfi yuqori ekanini inobatga olib, Rossiya va AQSh tajribalarini o‘rganib, yo‘lovchilarga bir martalik qo‘lqoplarni tarqatib, 19-oktabrdan avtobus va metroda qo‘lqopdan foydalanish talabi kiritildi.

Buning eng asosiy sababi – har bir yo‘lovchi bir kunda o‘rtacha 20-30 daqiqani transportda o‘tkazadi. Shu davrda yo‘lovchilarimizga chiptachilar, haydovchilar hamda metrodagi kassa va metro operatorlari tomonidan bepul bir martalik qo‘lqoplar tarqatilmoqda. Metro, avtobus tutqichlari qo‘lqoplardan foydalangan holda ushlansa, kasallikni yuqtirib olish xavfi kamayadi”, — degan Toshkent shahar Transport boshqarmasi vakili.

U metropolitenning har bir vestibyuli, bekatida kuzatuv o‘tkazilganini, unga ko‘ra, antiseptik quyish moslamasi o‘rnatilgan bo‘lishiga qaramay, undan foydalanganlar ko‘rsatkichi, 5-10 foizni tashkil qilganini ta’kidlagan.