O‘zbekiston Sog‘liqni saqlash vazirligi Odam savdosi qurbonlariga yordam ko‘rsatish respublika markazini Ichki ishlar vazirligi (IIV) tasarrufiga o‘tkazishni taklif qilmoqda. Bu haqdagi Vazirlar Mahkamasining qarori loyihasi vazirlik tomonidan 8-oktabr kuni jamoatchilik muhokamasi uchun e’lon qilindi, deb yozmoqda “Gazeta.uz”.
Mazkur markaz 2018-yilning dekabr oyidan buyon Sog‘liqni saqlash vazirligi huzuridagi Tibbiy-ijtimoiy xizmatlar agentligi tarkibida turibdi.
Qaror loyihasiga ko‘ra, 2021-yildan boshlab markaz uchun ajratilgan joylar sonini 30 tadan 50 taga oshirish rejalashtirilmoqda. Bundan tashqari, Qoraqalpog‘iston Respublikasi, Farg‘ona va Samarqand viloyatlarida markazning 30 ta o‘ringa mo‘ljallangan hududiy bo‘limlarini ochish ko‘zda tutilmoqda.
Odam savdosi qurbonlari, shu jumladan, O‘zbekiston fuqarolari, chet elliklar va fuqaroligi bo‘lmagan shaxslar reabilitatsiya markaziga 30 kunga joylashtirilishi mumkin. Zarur hollarda bu muddat 90 kunni tashkil etishi, shaxsning hayoti va sog‘lig‘iga xavf mavjud bo‘lgan taqdirda bu muddat uzaytirilishi mumkin. Odam savdosining har bir qurboniga yordam kompleks o‘rganish, sog‘liqni va zarur yordamni baholash natijalari asosida ishlab chiqilgan individual reja asosida ko‘rsatiladi.
“Gazeta.uz”ning Ichki ishlar vazirligi ma’lumotlariga tayanib yozishicha, odam savdosi qurbonlari ko‘pincha ayollar bo‘ladi. 2017-yilda odam savdosi qurboni bo‘lgan 501 kishidan, shu jumladan, 61 nafar chaqaloq, 303 nafari ayollar, 198 nafari erkaklar bo‘lgan. 2018-yilda 147 nafar ayol va 103 nafar erkak odam savdosi qurboniga aylangan, ularning 41 nafarini chaqaloqlar tashkil qilgan. 2019-yilda 87 nafar ayol, 3 nafar erkak va 35 nafar yosh bola odam savdosi qurbonlari qatoridan joy olgan. Chaqaloqlar savdosi odam savdosi bilan bog‘liq barcha jinoyatlarning 43 foizini tashkil qiladi. Senat raisi Tanzila Norboyeva bunday jinoyatlarning 32 foizida ishtirokchilar tibbiyot xodimlari bo‘lishini ma’lum qilgandi.
Shavkat Mirziyoyev 2020-yilning avgust oyida yangi tahrirdagi “Odam savdosiga qarshi kurash to‘g‘risida”gi qonunni imzoladi. Mazkur qonunga yangi tushunchalar kiritilgan, profilaktika choralari, odam savdosi qurbonlarini, shu jumladan, voyaga yetmaganlarni aniqlash tartibi va ularning huquqlari tavsiflangan.
Vazirlar Mahkamasi qarorining loyihasi muhokamasi 23-oktabrgacha davom etadi.
Izoh (0)