Ўзбекистон Соғлиқни сақлаш вазирлиги Одам савдоси қурбонларига ёрдам кўрсатиш республика марказини Ички ишлар вазирлиги (ИИВ) тасарруфига ўтказишни таклиф қилмоқда. Бу ҳақдаги Вазирлар Маҳкамасининг қарори лойиҳаси вазирлик томонидан 8 октябрь куни жамоатчилик муҳокамаси учун эълон қилинди, деб ёзмоқда «Gazeta.uz».
Мазкур марказ 2018 йилнинг декабрь ойидан буён Соғлиқни сақлаш вазирлиги ҳузуридаги Тиббий-ижтимоий хизматлар агентлиги таркибида турибди.
Қарор лойиҳасига кўра, 2021 йилдан бошлаб марказ учун ажратилган жойлар сонини 30 тадан 50 тага ошириш режалаштирилмоқда. Бундан ташқари, Қорақалпоғистон Республикаси, Фарғона ва Самарқанд вилоятларида марказнинг 30 та ўринга мўлжалланган ҳудудий бўлимларини очиш кўзда тутилмоқда.
Одам савдоси қурбонлари, шу жумладан, Ўзбекистон фуқаролари, чет элликлар ва фуқаролиги бўлмаган шахслар реабилитация марказига 30 кунга жойлаштирилиши мумкин. Зарур ҳолларда бу муддат 90 кунни ташкил этиши, шахснинг ҳаёти ва соғлиғига хавф мавжуд бўлган тақдирда бу муддат узайтирилиши мумкин. Одам савдосининг ҳар бир қурбонига ёрдам комплекс ўрганиш, соғлиқни ва зарур ёрдамни баҳолаш натижалари асосида ишлаб чиқилган индивидуал режа асосида кўрсатилади.
«Gazeta.uz»нинг Ички ишлар вазирлиги маълумотларига таяниб ёзишича, одам савдоси қурбонлари кўпинча аёллар бўлади. 2017 йилда одам савдоси қурбони бўлган 501 кишидан, шу жумладан 61 нафар чақалоқ, 303 нафари аёллар, 198 нафари эркаклар бўлган. 2018 йилда 147 нафар аёл ва 103 нафар эркак одам савдоси қурбонига айланган, уларнинг 41 нафарини чақалоқлар ташкил қилган. 2019 йилда 87 нафар аёл, 3 нафар эркак ва 35 нафар ёш бола одам савдоси қурбонлари қаторидан жой олган. Чақалоқлар савдоси одам савдоси билан боғлиқ барча жиноятларнинг 43 фоизини ташкил қилади. Сенат раиси Танзила Норбоева бундай жиноятларнинг 32 фоизида иштирокчилар тиббиёт ходимлари бўлишини маълум қилганди.
Шавкат Мирзиёев 2020 йилнинг август ойида янги таҳрирдаги «Одам савдосига қарши кураш тўғрисида»ги қонунни имзолади. Мазкур қонунга янги тушунчалар киритилган, профилактика чоралари, одам савдоси қурбонларини, шу жумладан вояга етмаганларни аниқлаш тартиби ва уларнинг ҳуқуқлари тавсифланган.
Вазирлар Маҳкамаси қарорининг лойиҳаси муҳокамаси 23 октябргача давом этади.
Изоҳ (0)