Samarqandda COVID-19 bilan kasallanganlarni davolash uchun yana bir tashxislash va davolash markazi tayyor bo‘ldi, deya xabar bermoqda STV.
Ma’lum qilinishida, ayni paytda mazkur markazda bemorlar yo‘q. Ammo kasallik ko‘payib ketishi ehtimolini hisobga olgan holda tayyorlangan mazkur markazda ayni paytda davolash ishlarini amalga oshirish uchun barcha sharoitlar yaratilgan.
2-son maxsus taqsimlash davolash markazi 500 o‘ringa mo‘ljallangan bo‘lib, unda 6 ta reanimatsiya (50 o‘rinli), nefrologiya, nevrologiya, endokrinologiya, kardiologiya va intensiv davolash bo‘limlari mavjud.
Bemorlar uchun zarur dori-darmon, gigiyena vositalari keltirilgan. Tibbiyot xodimlari uchun maxsus tibbiyot vositalari shay holatda.
Markazga 30 ta kardiomonitor, 30 ta kislorod konsentrati, 17 ta sipap, 6 ta IVL, 1 ta defibrillyator, portativ rentgen, UTT, EKG apparatlari, kompyuter va noutbuklar keltirilib, muassasada yagona aloqa tizimi tashkil etildi. Shuningdek, 28 ta kuzatuv kamerasi o‘rnatildi. 10 ta nogironlik aravachasi, 20 ta sanitar aravacha, 20 ta muolaja aravachasi, 30 ta kuler kabi zarur anjomlar keltirilgan.
Eslatib o‘tamiz, Toshkent shahridagi “O‘zekspomarkaz”da tashkil qilingan 1000 o‘rinli taqsimlash markazi Toshkent shahar hokimligi boshqaruvida faoliyat olib bormoqda.
Bundan tashqari, “O‘zekspomarkaz”ning 1 va 2-pavilyonida tashkil qilingan 814 o‘rinli gospitalni boshqarish Mudofaa vazirligi zimmasiga yuklangan. “Yoshlik” sport majmuasida tashkil qilingan 520 o‘rinli taqsimlash markazi Davlat xavfsizlik xizmati boshqaruvi ostida faoliyat olib bormoqda. Gimnastika saroyida 750 o‘rinli markaz ishga tushirilgan va Ichki ishlar vazirligiga biriktirilgan.
Shuningdek, Toshkentdagi Atlas savdo majmuasi binosida 1000 o‘rinli koronavirusga chalingan va gumon qilingan bemorlarni qabul qilish va taqsimlash markazi ishga tushirilgan.
Izoh (0)