Самарқандда COVID-19 билан касалланганларни даволаш учун яна бир ташхислаш ва даволаш маркази тайёр бўлди, дея хабар бермоқда STV.
Маълум қилинишида, айни пайтда мазкур марказда беморлар йўқ. Аммо касаллик кўпайиб кетиши эҳтимолини ҳисобга олган ҳолда тайёрланган мазкур марказда айни пайтда даволаш ишларини амалга ошириш учун барча шароитлар яратилган.
2-сон махсус тақсимлаш даволаш маркази 500 ўринга мўлжалланган бўлиб, унда 6 та реанимация (50 ўринли), нефрология, неврология, эндокринология, кардиология ва интенсив даволаш бўлимлари мавжуд.
Беморлар учун зарур дори-дармон, гигиена воситалари келтирилган. Тиббиёт ходимлари учун махсус тиббиёт воситалари шай ҳолатда.
Марказга 30 та кардиомонитор, 30 та кислород концентрати, 17 та сипап, 6 та ИВЛ, 1 та дефибриллятор, портатив рентген, УТТ, ЭКГ аппаратлари, компьютер ва ноутбуклар келтирилиб, муассасада ягона алоқа тизими ташкил этилди. Шунингдек, 28 та кузатув камераси ўрнатилди. 10 та ногиронлик аравачаси, 20 та санитар аравача, 20 та муолажа аравачаси, 30 та кулер каби зарур анжомлар келтирилган.
Эслатиб ўтамиз, Тошкент шаҳридаги «Ўзэкспомарказ»да ташкил қилинган 1000 ўринли тақсимлаш маркази Тошкент шаҳар ҳокимлиги бошқарувида фаолият олиб бормоқда.
Бундан ташқари, «Ўзэкспомарказ»нинг 1 ва 2-павильонида ташкил қилинган 814 ўринли госпитални бошқариш Мудофаа вазирлиги зиммасига юкланган. «Ёшлик» спорт мажмуасида ташкил қилинган 520 ўринли тақсимлаш маркази Давлат хавфсизлик хизмати бошқаруви остида фаолият олиб бормоқда. Гимнастика саройида 750 ўринли марказ ишга туширилган ва Ички ишлар вазирлигига бириктирилган.
Шунингдек, Тошкентдаги Атлас савдо мажмуаси биносида 1000 ўринли коронавирусга чалинган ва гумон қилинган беморларни қабул қилиш ва тақсимлаш маркази ишга туширилган.
Изоҳ (0)