O‘zbekiston va Yevropa ittifoqi 7 va 8-oktabr kunlari Sheriklik va hamkorlik to‘g‘risidagi bitim doirasida, Adliya va ichki ishlar, inson huquqlari va aralash masalalar bo‘yicha kichik qo‘mitaning 16-majlisini o‘tkazdi. Uchrashuv Bryussel va Toshkent o‘rtasidagi videoaloqa orqali bo‘lib o‘tdi, deb yozadi “Gazeta.uz”.
Yig‘ilishda keng doiradagi mavzular, shu jumladan, inson huquqlari va demokratiya bilan bog‘liq masalalar, terrorizmga qarshi kurash, migratsiya va chegaralarni boshqarish, narkotiklarga nisbatan siyosat va korrupsiyaga qarshi kurash muhokama qilindi.
Kichik qo‘mita O‘zbekiston va Yevropa ittifoqida inson huquqlari, demokratiya, adliya va ichki ishlar sohasidagi so‘nggi voqealarni ko‘rib chiqdi va muhokama qildi. Ishtirokchilar qonun ustuvorligini ta’minlashda fuqarolik jamiyatining roli muhimligini bir ovozdan qayd etdi.
O‘zbekistonda islohotlar dasturi kontekstidagi ijobiy siljishlar, shu jumladan, Jasliq qamoqxonasining yopilishi va mahbuslarning ozod etilishiga qaramay, Yevroittifoq O‘zbekistonda fikr ifoda qilish, nohukumat tashkilotlarni ro‘yxatdan o‘tkazish, jazoni ijro etish tizimida qiynoqlar, shafqatsiz munosabatning saqlanib qolishi, gender tengligi va ayollar huquqlari bilan bog‘liq bir qator muammolar yuzasidan xavotir bildirdi.
Yevroittifoq O‘zbekistonni hibsda saqlash joylarini to‘siqsiz va mustaqil monitoring qilishni taqdim etish va boshqa yo‘llar orqali qiynoqlarni tag-tomiri bilan yo‘q qilish bo‘yicha bundan keyingi majburiyatlarni o‘z bo‘yniga olishga chaqirdi. Yevroittifoq, shuningdek, sobiq mahbuslarni reabilitatsiya qilish zaruriyatini ta’kidladi.
O‘zbekiston, o‘z navbatida, yig‘ilishda huquq tizimini modernizatsiya qilish va ishbilarmonlik iqlimini yaxshilash bo‘yicha, shuningdek, korrupsiya bilan kurash bo‘yicha o‘z prioritetlari va chora-tadbirlarini taqdim etdi.
Izoh (0)