Sirdaryo viloyatida yashovchi ayol o‘zida OITS kasalligi borligini bila turib, bu kasalni o‘z umr yo‘ldoshiga yuqtirganlikda aybdor deb topildi, deya xabar bermoqda jinoyat ishlari bo‘yicha Xovos tuman sudi sudyasi B.Mamadaminov.
Ma’lum bo‘lishicha, F. ismli ayolda 2016-yilda OITS kasalligi aniqlangan. Ayol o‘zining kasallikka chalinganini bilsa-da, uyiga kelgan sovchilardan buni yashirgan. Ayol 2020-yil 7-mart kuni Z. ismli erkak bilan sha’riy nikohdan o‘tib, bir oila bo‘lib yashay boshlagan, oxir-oqibat OITS kasalligini erkak ham yuqtirib olgan.
Sud ayolni Jinoyat kodeksining 113-moddasi 4-qismida (bila turib, boshqa shaxsni OIV kasalligi/OITSni yuqtirish xavfi ostida qoldirish yoki unga OIV kasalligi/OITSni yuqtirish) nazarda tutilgan jinoyatni sodir etganlikda aybdor deb topgan (ushbu modda bo‘yicha aybdor deb topilganlar 5 yildan 8 yilgacha ozodlikdan mahrum qilinadi).Ayni vaqtda, ayolning aybiga to‘liq iqrorligi, qilmishidan pushaymonligi, muqaddam sudlanmagani va jabrlanuvchining da’vosi yo‘qligi inobatga olinib, unga Jinoyat kodeksining 113-moddasi 4-qismi bilan 57-moddani (yengilroq jazo tayinlash) qo‘llab, soat 22:00 dan 06:00 gacha yashash joyidan chiqishni cheklagan holda 2 yilga ozodlikni cheklash jazosi tayinlangan.
Izoh (0)