Toshkentda o‘pkani MSKT qildirish narxi koronavirus pandemiyasiga qadar 90 ming so‘mdan 150 ming so‘mgacha bo‘lgan, pandemiya davrida (iyul—avgust oylariga kelib) 195 ming so‘mdan 400 ming so‘mgacha ko‘tarilgan. Bu haqda, Toshkent shahrida joylashgan tibbiyot muassasalaridagi o‘pkaning multispiral kompyuter tamografiyasi (MSKT) narxlarini o‘rganib chiqib, Monopoliyaga qarshi kurashish qo‘mitasi (MQKQ) ma’lum qildi.
Qo‘mitaning qayd etishicha, yuzaga kelgan epidemiologik vaziyat aholi o‘rtasida o‘pkaning multispiral kompyuter tomografiyasiga (MSKT) bo‘lgan ehtiyojining ortishiga sabab bo‘lgan. Dastlabki tezkor o‘rganish natijalariga ko‘ra, iyul—avgust oylarida Toshkentda 18 ta tibbiyot muassasasida MSKT xizmati ko‘rsatilgan. Xizmatning umumiy qiymati 185 milliard so‘mni tashkil etgan. U yoki bu shaxs bozorni monopollashtirib olgani aniqlanmagan.
“Klinikalardan olingan ma’lumotlarga ko‘ra, narxning o‘sishi MSKTga bo‘lgan talabning keskin ortishi, kasallanganlar soni ko‘payishi bilan bog‘liq bo‘lib, shu sababli ko‘plab tibbiyot muassasalari 24 soatlik ish tartibiga o‘tgani, uskunalarga ortiqcha yuklama tushayotgani, bu esa ularning tez buzilishiga sabab bo‘layotgani, qayta tiklash uchun butlovchi va ehtiyot qismlarni doimiy sotib olishga to‘g‘ri kelayotgani ko‘rsatilgan”, - deyiladi qo‘mita axborotida.
Bundan tashqari, tibbiyot muassasalarning 24 soatlik ish tartibiga o‘tgani ortidan xodimlarga qo‘shimcha haq to‘lashga to‘g‘ri kelgani ham xizmat narxining ko‘tarilishiga ta’sir ko‘rsatgan. “Ayrim tibbiyot muassasalarining hisob-kitoblarini o‘rganish natijalari MSKT narxlarining oshishi xizmatning o‘ziga xos xususiyatlari va individual yondashuvidan kelib chiqqan holda shakllanishining to‘g‘riligini ko‘rsatdi”, - deya qayd etib o‘tgan qo‘mita.
Ayni vaqtda, Monopoliyaga qarshi kurash kurashish qo‘mitasi, O‘zbekistondagi epidemiologik vaziyatni hisobga olgan holda, xususiy tibbiyot muassasalariga MSKT xizmati uchun narxlarni asossiz oshirmaslik haqida ko‘rsatma bergan.
Izoh (0)