Ўзбекистон ва Европа иттифоқи 7 ва 8 октябрь кунлари Шериклик ва ҳамкорлик тўғрисидаги битим доирасида, Адлия ва ички ишлар, инсон ҳуқуқлари ва аралаш масалалар бўйича кичик қўмитанинг 16-мажлисини ўтказди. Учрашув Брюссель ва Тошкент ўртасидаги видеоалоқа орқали бўлиб ўтди, деб ёзади «Gazeta.uz».
Йиғилишда кенг доирадаги мавзулар, шу жумладан, инсон ҳуқуқлари ва демократия билан боғлиқ масалалар, терроризмга қарши кураш, миграция ва чегараларни бошқариш, наркотикларга нисбатан сиёсат ва коррупцияга қарши кураш муҳокама қилинди.
Кичик қўмита Ўзбекистон ва Европа иттифоқида инсон ҳуқуқлари, демократия, адлия ва ички ишлар соҳасидаги сўнгги воқеаларни кўриб чиқди ва муҳокама қилди. Иштирокчилар қонун устуворлигини таъминлашда фуқаролик жамиятининг роли муҳимлигини бир овоздан қайд этди.
Ўзбекистонда ислоҳотлар дастури контекстидаги ижобий силжишлар, шу жумладан, Жаслиқ қамоқхонасининг ёпилиши ва маҳбусларнинг озод этилишига қарамай, Евроиттифоқ Ўзбекистонда фикр ифода қилиш, ноҳукумат ташкилотларни рўйхатдан ўтказиш, жазони ижро этиш тизимида қийноқлар, шафқатсиз муносабатнинг сақланиб қолиши, гендер тенглиги ва аёллар ҳуқуқлари билан боғлиқ бир қатор муаммолар юзасидан хавотир билдирди.
Евроиттифоқ Ўзбекистонни ҳибсда сақлаш жойларини тўсиқсиз ва мустақил мониторинг қилишни тақдим этиш ва бошқа йўллар орқали қийноқларни таг-томири билан йўқ қилиш бўйича бундан кейинги мажбуриятларни ўз бўйнига олишга чақирди. Евроиттифоқ, шунингдек, собиқ маҳбусларни реабилитация қилиш заруриятини таъкидлади.
Ўзбекистон, ўз навбатида, йиғилишда ҳуқуқ тизимини модернизация қилиш ва ишбилармонлик иқлимини яхшилаш бўйича, шунингдек, коррупция билан кураш бўйича ўз приоритетлари ва чора-тадбирларини тақдим этди.
Изоҳ (0)