Toshkentda 1100 dan ortiq fuqaroni 6,2 mlrd so‘mga chuv tushirgan xususiy bandlik agentligining kirdikorlari fosh qilindi

Recruit Consulting Work MChJ xususiy bandlik agentligi mansabdor shaxslari 2019-yilning yanvar oyidan noyabr oyiga qadar fuqarolarni Koreya, Yaponiya, Latviya, Litva, Chexiya, Niderlandiya, Germaniya, Shvetsiya, Slovakiya kabi davlatlarda ish topib berish va ishga joylashtirishni va’da qilib, juda ko‘p miqdordagi pullarini firibgarlik yo‘li bilan egallagan. Mazkur holat yuzasidan 2019-yil 23-dekabr kuni Chilonzor tuman prokuraturasi tomonidan J.A. va boshqalarga nisbatan Jinoyat kodeksining 168-moddasi 4-qismi “a” bandi bilan jinoyat ishi qo‘zg‘atilgandi.

“Kun.uz” nashri Ichki ishlar vazirligi huzuridagi Tergov departamenti ma’lumotlariga tayangan holda jinoyat ishi bo‘yicha qo‘shimcha axborotlarni e’lon qildi.

Qayd etilishicha, tergov harakatlari departament ish yurituviga qabul qilinib, viloyatlarda istiqomat qiluvchi 1100 dan ortiq jabrlanuvchilarni so‘roq qilish va ular bilan bog‘liq tergov harakatlarini o‘tkazish maqsadida tegishli Tergov boshqarmalariga alohida topshiriqlar yuborilgan.

Jinoyat ishi bo‘yicha to‘rt nafar shaxs Jinoyat kodeksining 168-moddasi (firibgarlik) 4-qismi “a,v” bandlari, 211-moddasi (pora berish) 3-qismi “b” bandi, 167-moddasi (o‘zlashtirish yoki rastrata yo‘li bilan talon-toroj qilish) 3-qismi “a,v” bandlari va 184-moddasi (soliqlar yoki boshqa majburiy to‘lovlarni to‘lashdan bo‘yin tovlash) 3-qismi bilan ayblanuvchi tariqasida ishtirok etishga jalb qilinib, ularga nisbatan qamoqqa olish tarzidagi ehtiyot chorasi qo‘llanilgan.

Olib borilgan dastlabki tergov harakatlari davomida mazkur xususiy bandlik agentligi tomonidan 1087 nafar fuqarolarga jami 6,2 milliard so‘m miqdorida zarar yetkazilgan. Yetkazilgan zararning 272 million so‘mi naqd pul ko‘rinishida qoplangan, 48,7 million so‘mlik tovar-moddiy boyliklari hamda 505,6 million so‘mlik pul mablag‘lari xatlangan.

Jamiyat xodimlari fuqarolardan aldov yo‘li bilan shartnomadan tashqari naqd pul ko‘rinishida 650 million so‘mdan ortiq mablag‘larini olishgan. Bundan tashqari, jamiyat mansabdor shaxslari fuqarolarni Tashqi mehnat migratsiyasi agentligida chet tillari bo‘yicha imtihonlardan o‘tkazish va Yaponiyaga yuborishni va’da qilib, aldov yo‘li bilan 212 ming AQSh dollari miqdorida naqd pul olgan. Bu pullarning 120 ming 500 dollari fuqarolarga qaytarilgan.

“Dastlabki tergov harakatlari 2020-yil iyul oyida tamomlanib, jinoyat ishi mazmunan ko‘rib chiqish uchun jinoyat ishlari bo‘yicha Toshkent shahar sudiga yuborilgan. Jinoyat ishining sudda ko‘rib chiqilishi natijalari bo‘yicha qo‘shimcha ma’lumot beriladi”, – deyiladi xabarda.