Наманганлик спортчи ва волонтёр Гулсанам Алижонова айни пайтда Тошкентда таэквондо WTF бўйича миллий терма жамоа машғулотларида қатнашмоқда. Бу ҳақда «Дарё» мухбири Азизбек Абдувалиев хабар бермоқда.
Алижонованинг айтишича, у ҳозирда Тошкентдаги «Универсал» спорт саройида мамлакат биринчилигига тайёргарлик кўряпти. Машғулотлар жорий йил 2 октябрда бошланган ва 40 кун давом этади.
«Кейин эса навбат Осиё ва жаҳон чемпионатларига. Энг катта орзуйим эса 2024 йили Францияда бўлиб ўтадиган Олимпиада ўйинларида қатнашиш. Ўша йили 27 ёшга тўлар эканман. Бу вазифани уддалайман ва ғолиб бўламан, деган умиддаман»,— дейди Гулсанам.
Гулсанам машғулотларга қатнашиш билан бир қаторда саратон хасталигига чалинган ойисининг саломатлигидан ҳам безовта эканлигини билдирди. 58 ёшни қаршилаган онахон иккинчи гуруҳ ногирони ҳисобланади.
«Мен билан боғлиқ можаролар туфайли ойим қаттиқ сиқилди. Ўзи асаблари чарчаган эди, яна кучли зўриқиш бўлди. Энди саломатликларини тиклаш учун яхши бир санаторийга жўнатиш ҳаракатидамиз», — дейди Алижонова.
Гулсанам бўлиб ўтган ишлардан керакли хулоса чиқарганлигини таъкидлади.
«Шу баҳонада ким қандайлигини билиб олдим. Чунки видео тарқалиб кетганидан сўнг мендан юз ўгирган, ортимдан кулган, масхаралаганлар бўлди. Энди онам учун ҳам ҳеч ким билан сан-манга бормайман, мураббийларимга қулоқ соламан. Менга у кишининг соғлиғи керак. Бор эътиборимни спортга қаратаман. Айнан спорт барча орзуларим рўёбга чиқишига кўмаклашади, деб ўйлайман», — дейди Гулсанам.
Эслатиб ўтамиз, 23 ёшли қиз жамоат жойида калта шортида юргани учун йигитлар унга танбеҳ берган. Воқеа сан-манга бориб етгач қўл-оёқлар ишга тушган. 8 сентябрь куни Алижоновага тергов иши қўзғатилганлиги айтилди. Бироқ ҳодиса жамоатчилик диққатига тушиб, кўпчилик қизни ёқлаб чиқди. Алижонова пандемия даврида волонтёрлик ишлари билан шуғуллангани маълум бўлди. Саида Мирзиёева ҳам фикрини билдирди.
Шундан кейин Ёшлар ишлари агентлиги вилоят бошқармаси жиноят иши юзасидан вилоят прокуратурасига жазони енгиллаштириш бўйича амалий ёрдам сўраб мурожаат қилди, Ёшлар иттифоқи эса қизни кафилликка олди. Шу тариқа таэквондочи қизга қарши қўзғатилган жиноят иши тугатилганди.
Мавзуга доир:
Изоҳ (0)