Qashqadaryo viloyati hokimi Zoir Mirzayev faoliyati davomida muammolarga duch kelayotgan tadbirkorlar bilan to‘g‘ridan to‘g‘ri Zoom dasturi orqali muloqot qildi, deya xabar bermoqda viloyat prokuraturasi.
Suhbat davomida Qarshi tumani Xonobod hududidan 27 nafar tadbirkorga issiqxona qurish uchun tuman hokimining qarori bilan 124 gektar yer maydoni ajratilgani, biroq ular kredit olish uchun tijorat banklariga zarur hujjatlarni topshirganiga qaramasdan, bank xodimlari moliyaviy resurs yo‘qligini ro‘kach qilib, tadbirkorlarga hamon kredit ajratishni ortga surib kelayotgani aytilgan.
Bu holatning oldini olish maqsadida Z.Mirzayevning topshirig‘i bilan viloyat prokuraturasi xodimlaridan iborat ishchi guruh tuzilib, hududdagi tijorat banklari tomonidan ko‘rsatilayotgan xizmatlarni o‘rganish vazifasi yuklatilgan.
Bu xabarga munosabat bildirgan iqtisodchi Otabek Bakirov o‘zining Telegram kanalida bu qaror banklarning mustaqilligiga zid hisoblanishini ta’kidlagan.
Ma’lumot uchun, “Banklar va bank faoliyati to‘g‘risida”gi (yangi tahriri) qonunning 8-moddasiga (banklarning mustaqilligi) ko‘ra, banklar moliyaviy operatsiyalarni amalga oshirish bilan bog‘liq qarorlar qabul qilishda mustaqildir. Davlat organlari va ularning mansabdor shaxslariga banklar faoliyatiga, shu jumladan, banklarning kredit portfelini va aktivlarini shakllantirish bilan bog‘liq tadbirkorlik tavakkalchiliklarini boshqarishga, banklarning rahbar xodimlarini tayinlashga aralashish, shuningdek, bankning mablag‘lari hisobidan turli xil to‘lovlar va badallar talab qilish taqiqlanadi.
Izoh (0)