Қашқадарё вилояти ҳокими Зоир Мирзаев фаолияти давомида муаммоларга дуч келаётган тадбиркорлар билан тўғридан-тўғри Zoom дастури орқали мулоқот қилди, дея хабар бермоқда вилоят прокуратураси.
Суҳбат давомида Қарши тумани Хонобод ҳудудидан 27 нафар тадбиркорга иссиқхона қуриш учун туман ҳокимининг қарори билан 124 гектар ер майдони ажратилгани, бироқ улар кредит олиш учун тижорат банкларига зарур ҳужжатларни топширганига қарамасдан, банк ходимлари молиявий ресурс йўқлигини рўкач қилиб, тадбиркорларга ҳамон кредит ажратишни ортга суриб келаётгани айтилган.
Бу ҳолатнинг олдини олиш мақсадида З.Мирзаевнинг топшириғи билан вилоят прокуратураси ходимларидан иборат ишчи гуруҳ тузилиб, ҳудуддаги тижорат банклари томонидан кўрсатилаётган хизматларни ўрганиш вазифаси юклатилган.
Бу хабарга муносабат билдирган иқтисодчи Отабек Бакиров ўзининг Telegram каналида бу қарор банкларнинг мустақиллигига зид ҳисобланишини таъкидлаган.
Маълумот учун, «Банклар ва банк фаолияти тўғрисида»ги (янги таҳрири) қонуннинг 8-моддасига (банкларнинг мустақиллиги) кўра, банклар молиявий операцияларни амалга ошириш билан боғлиқ қарорлар қабул қилишда мустақилдир. Давлат органлари ва уларнинг мансабдор шахсларига банклар фаолиятига, шу жумладан, банкларнинг кредит портфелини ва активларини шакллантириш билан боғлиқ тадбиркорлик таваккалчиликларини бошқаришга, банкларнинг раҳбар ходимларини тайинлашга аралашиш, шунингдек, банкнинг маблағлари ҳисобидан турли хил тўловлар ва бадаллар талаб қилиш тақиқланади.
Изоҳ (0)