Vazirlar Mahkamasining “Koronavirus pandemiyasi tufayli yuzaga kelgan iqtisodiy vaziyatda turizm sohasi subyektlarini qo‘llab-quvvatlash va turizm infratuzilmasini rivojlantirish to‘g‘risida”gi qarori qabul qilindi, deya xabar bermoqda “Kun.uz”
Turizm sohasining alohida subyektlari faoliyati bilan bog‘liq xarajatlarni qisman kompensatsiya qilish va xo‘jalik subyektlarining epidemiyaga qarshi kurashish profilaktik tadbirlarini amalga oshirishga yo‘naltirilgan xarajatlarini qoplashning vaqtinchalik tartibi to‘g‘risida nizom tasdiqlandi.
Unga ko‘ra, davlat subsidiyasi yuridik shaxslarga yangi dor yo‘llarini qurish va jihozlash xarajatlarini qoplash uchun ajratiladi.
Shu bilan birga, davlat subsidiyasi yo‘lovchi tashuvchi yangi dor yo‘llarini 2023-yil 31-dekabrga kadar foydalanishga topshirish va uzunligi bir tomonga 500 metrdan kam bo‘lmaslik sharti bilan yangi dor yo‘llarini qurish va jihozlash bo‘yicha dastlabki 50 ta loyihaga ajratiladi.
Turizm qo‘mitasi respublika bo‘yicha qurilgan yangi dor yo‘llarining hisobini yuritadi va o‘zining rasmiy veb-saytida e’lon qilib boradi.
Davlat subsidiyasi bir marta ajratiladi hamda uning miqdori har 500 metr yo‘l uchun 1 milliard so‘mni tashkil qiladi.
Investor davlat subsidiyasi ajratilishi uchun Turizm qo‘mitasiga davlat subsidiyasi olish to‘g‘risidagi ariza bilan yozma yoki elektron shaklda murojaat qiladi.
Bunda, arizalarni qabul qilish 2023-yil 15-dekabrga qadar yoki Turizm qo‘mitasi tomonidan rasmiy veb-saytda yangi dor yo‘llarining soni 50 taga yetganligi e’lon qilingan kungacha, ularni ko‘rib chiqish esa 2023-yil 31-dekabrga kadar yoki Turizm qo‘mitasi tomonidan rasmiy veb-saytda yangi dor yo‘llarining soni 50 taga yetganligi e’lon qilingan kundan boshlab 10 kun mobaynida amalga oshiriladi.
Mavzuga doir: Bo‘stonliqda tog‘ turizmini rivojlantirishga 500 mln dollargacha investitsiya jalb qilinadi
Unga ko‘ra turizm sohasi subyektlarining kreditlari bo‘yicha quyidagi foiz xarajatlarining Markaziy bank asosiy stavkasidan oshgan, biroq 10 foizlik punktdan ortiq bo‘lmagan qismi kompensatsiya qilinadi:
- joylashtirish vositalarini qurish uchun oldin berilgan kreditlar bo‘yicha 2020-yil 1-iyundan 2022-yil 1-yanvargacha bo‘lgan foiz xarajatlari;
- yangi sanitariya-gigiyena talablariga muvofiqlashtirish uchun beriladigan kreditlar bo‘yicha foiz xarajatlari;
- aylanma mablag‘larni to‘ldirish uchun beriladigan 1 milliard so‘mgacha miqdordagi kreditlar bo‘yicha 2020-yil -yundan 31-dekabrga qadar bo‘lgan foiz xarajatlari.
Ushbu kompensatsiyalar turizm sohasi subyektlarining kreditlari soni va hajmidan, shuningdek, oldin berilgan va (yoki) berilayotgan kompensatsiyalar sonidan qat’iy nazar ajratiladi.
Qaror bilan turoperatorlar, turagentlar va joylashtirish vositalari xarajatlarining bir qismini qoplash uchun subsidiyalar berishning vaqtinchalik tartibi to‘g‘risida nizom tasdiqlandi.
Nizomga muvofiq, subsidiyalar:
- turoperatorlarga – avia va temiryo‘l chiptalari xarajatlarining bir qismini qoplash uchun;
- turoperator va turagentlarga – O‘zbekistonga olib kelingan va xizmat ko‘rsatilgan har bir xorijiy turist uchun;
- joylashtirish vositalariga – joylashtirish xizmatlari (mehmonxona xizmatlari) uchun ajratiladi.
Izoh (0)