Вазирлар Маҳкамасининг «Коронавирус пандемияси туфайли юзага келган иқтисодий вазиятда туризм соҳаси субъектларини қўллаб-қувватлаш ва туризм инфратузилмасини ривожлантириш тўғрисида»ги қарори қабул қилинди, дея хабар бермоқда «Kun.uz»
Туризм соҳасининг алоҳида субъектлари фаолияти билан боғлиқ харажатларни қисман компенсация қилиш ва хўжалик субъектларининг эпидемияга қарши курашиш профилактик тадбирларини амалга оширишга йўналтирилган харажатларини қоплашнинг вақтинчалик тартиби тўғрисида низом тасдиқланди.
Унга кўра, давлат субсидияси юридик шахсларга янги дор йўлларини қуриш ва жиҳозлаш харажатларини қоплаш учун ажратилади.
Шу билан бирга, давлат субсидияси йўловчи ташувчи янги дор йўлларини 2023 йил 31 декабрга кадар фойдаланишга топшириш ва узунлиги бир томонга 500 метрдан кам бўлмаслик шарти билан янги дор йўлларини қуриш ва жиҳозлаш бўйича дастлабки 50 та лойиҳага ажратилади.
Туризм қўмитаси республика бўйича қурилган янги дор йўлларининг ҳисобини юритади ва ўзининг расмий веб-сайтида эълон қилиб боради.
Давлат субсидияси бир марта ажратилади ҳамда унинг миқдори ҳар 500 метр йўл учун 1 миллиард сўмни ташкил қилади.
Инвестор давлат субсидияси ажратилиши учун Туризм қўмитасига давлат субсидияси олиш тўғрисидаги ариза билан ёзма ёки электрон шаклда мурожаат қилади.
Бунда, аризаларни қабул қилиш 2023 йил 15 декабрга қадар ёки Туризм қўмитаси томонидан расмий веб-сайтда янги дор йўлларининг сони 50 тага етганлиги эълон қилинган кунгача, уларни кўриб чиқиш эса 2023 йил 31 декабрга кадар ёки Туризм қўмитаси томонидан расмий веб-сайтда янги дор йўлларининг сони 50 тага етганлиги эълон қилинган кундан бошлаб 10 кун мобайнида амалга оширилади.
Шунингдек қарорда туризм соҳасидаги тадбиркорлар харажатларининг бир қисми компенсация қилиниши белгиланган.Унга кўра туризм соҳаси субъектларининг кредитлари бўйича қуйидаги фоиз харажатларининг Марказий банк асосий ставкасидан ошган, бироқ 10 фоизлик пунктдан ортиқ бўлмаган қисми компенсация қилинади:
- жойлаштириш воситаларини қуриш учун олдин берилган кредитлар бўйича 2020 йил 1 июндан 2022 йил 1 январгача бўлган фоиз харажатлари;
- янги санитария-гигиена талабларига мувофиқлаштириш учун бериладиган кредитлар бўйича фоиз харажатлари;
- айланма маблағларни тўлдириш учун бериладиган 1 миллиард сўмгача миқдордаги кредитлар бўйича 2020 йил -юндан 31 декабрга қадар бўлган фоиз харажатлари.
Ушбу компенсациялар туризм соҳаси субъектларининг кредитлари сони ва ҳажмидан, шунингдек, олдин берилган ва (ёки) берилаётган компенсациялар сонидан қатъий назар ажратилади.
Қарор билан туроператорлар, турагентлар ва жойлаштириш воситалари харажатларининг бир қисмини қоплаш учун субсидиялар беришнинг вақтинчалик тартиби тўғрисида низом тасдиқланди.
Низомга мувофиқ, субсидиялар:
- туроператорларга – авиа ва темир йўл чипталари харажатларининг бир қисмини қоплаш учун;
- туроператор ва турагентларга – Ўзбекистонга олиб келинган ва хизмат кўрсатилган ҳар бир хорижий турист учун;
- жойлаштириш воситаларига – жойлаштириш хизматлари (меҳмонхона хизматлари) учун ажратилади.
Изоҳ (0)