Monopoliyaga qarshi kurashish agentligi huzuridagi Iste’molchilar huquqlarini himoya qilish agentligining ma’lum qilishicha, so‘nggi paytlarda O‘zbekistonda virusga qarshi “Remdesivir” dorisi va grippga qarshi “Inflyuvak” vaksinasining jiddiy taqchilligi kuzatilmoqda. Mazkur dori vositalarining narxi mos ravishda 1,8 million so‘m va 250 ming so‘mgacha ko‘tarilgan.
Agentlik dori vositalari va tibbiy buyumlarni sotadigan ulgurji va chakana savdo tashkilotlarining narxlarni davlat tomonidan shakllantirish tartibiga amal qilishi ustidan tizimli nazorat olib bormoqda. Gap chegaraviy savdo ustamalari haqida ketmoqda. Dorixonalar sotilayotgan dorilarga ular xarid qilinadigan ulgurji narxning 20 foizidan ortiq bo‘lmagan miqdorida ustama belgilashi mumkin. O‘z navbatida, ulgurji savdo kompaniyalari dorilarning bazaviy narxi, ya’ni import qilingan yoki O‘zbekistonda ishlab chiqarilgan dori narxining 15 foizidan ortiq bo‘lmagan miqdorda ustama belgilash huquqiga ega.
2020-yilning to‘qqiz oyi davomida 11 ta import qiluvchi kompaniya O‘zbekistonga COVID-19’ni davolashda ishlatilayotgan 56109 quti virusga qarshi “Remdesivir” dorisini import qilgan. Dorilarning umumiy qiymati ikki million dollardan oshgan.
Agentlikning hisob-kitobiga ko‘ra, mazkur dorining eng past chakana narxi 457 ming so‘mni tashkil qilishi kerak, eng baland narx esa 3,83 million so‘mga teng bo‘lishi kerak. O‘rtacha chakana narx esa 1,066 million so‘mni tashkil etishi lozim.
“Mazkur farq mahalliy importchilar tomonidan deklaratsiya qilingan turli narxlar bilan izohlanadi, shuningdek, ishlab chiqaruvchi davlatga bog‘liq”, — deyiladi agentlik xabarida.
Ta’kidlanishicha, eng yuqori import narxi Pharmhealth kompaniyasida kuzatilgan bo‘lib, Gruziyada ishlab chiqarilgan “Remdesivir” dorisining bir qutisi 270 dollardan olib kelingan. Eng past import narxi esa Serene Pharma kompaniyasida bo‘lgan — Hindistonda ishlab chiqarilgan “Remdak” preparatining bir qutisi 45 dollardan import qilingan.
Mazkur davr mobaynida Niderlandiyada ishlab chiqarilgan grippga qarshi “Inflyuvak” vaksinasining qiymati taxminan 800 ming dollar bo‘lgan 155490 qutisi ikkita import qiluvchi kompaniya tomonidan O‘zbekistonga olib kelingan.
Vaksinaning eng past chakana narxi 69 ming so‘mdan oshmasligi kerak, eng baland narx esa 102 ming so‘m bo‘lishi kerak. O‘rtacha chakana narx esa 86 ming so‘mni tashkil qiladi. Eng baland narx to‘rt valentli vaksinada kuzatilgan, eng past narx esa uch valentli vaksinaga to‘g‘ri kelgan.
Agentlik dori vositalarining chegaraviy chakana narxlarini hisob-kitob qilishda, ulgurji omborlardagi dori vositalari qoldiqlarini va kelgusi import prognozlarini o‘rganishda davom etadi, shuningdek, narxlarning oshib ketishiga qarshi kurash bo‘yicha choralar ko‘radi.
Agentlikning ta’kidlashicha, dorixonalar tomonidan litsenziya talablari va shartlarini, shu jumladan dori vositalari narxlarini shakllantirish tartibini tizimli ravishda (bir yil davomida ikki marta va undan ortiq) buzish qo‘pol qoidabuzarlik hisoblanadi va litsenziya bekor qilinishi uchun asos bo‘lishi mumkin.
Agentlik iste’molchilarni dori vositalarining qimmat narxlarda sotilishi holatlari haqida 1159 ishonch telefoniga va agentlikning +998712074600 yagona raqamiga xabar berishga chaqirmoqda.
Avvalroq Sog‘liqni saqlash vazirligi O‘zbekistonda COVID-19 kasalligiga chalingan bemorlarni davolashda “Remdesivir” va “Favipiravir” dori vositalaridan foydalanilayotganini ma’lum qilgandi.
Sog‘liqni saqlash vazirligi xabariga ko‘ra, hozirga qadar kasallikning boshlang‘ich bosqichidagi bemorlar uchun 17 ming nafar bemorga mo‘ljallangan 17 ming dona “Favipiravir” va og‘ir holatdagi 2500 nafar bemorga mo‘ljallangan 15 ming dona “Remdesivir” dori vositasi davolash muassasalariga bepul yetkazib berilgan.
Izoh (0)