Монополияга қарши курашиш агентлиги ҳузуридаги Истеъмолчилар ҳуқуқларини ҳимоя қилиш агентлигининг маълум қилишича, сўнгги пайтларда Ўзбекистонда вирусга қарши «Ремдесивир» дориси ва гриппга қарши «Инфлювак» вакцинасининг жиддий тақчиллиги кузатилмоқда. Мазкур дори воситаларининг нархи мос равишда 1,8 миллион сўм ва 250 минг сўмгача кўтарилган.
Агентлик дори воситалари ва тиббий буюмларни сотадиган улгуржи ва чакана савдо ташкилотларининг нархларни давлат томонидан шакллантириш тартибига амал қилиши устидан тизимли назорат олиб бормоқда. Гап чегаравий савдо устамалари ҳақида кетмоқда. Дорихоналар сотилаётган дориларга улар харид қилинадиган улгуржи нархнинг 20 фоизидан ортиқ бўлмаган миқдорида устама белгилаши мумкин. Ўз навбатида, улгуржи савдо компаниялари дориларнинг базавий нархи, яъни импорт қилинган ёки Ўзбекистонда ишлаб чиқарилган дори нархининг 15 фоизидан ортиқ бўлмаган миқдорда устама белгилаш ҳуқуқига эга.
2020 йилнинг тўққиз ойи давомида 11 та импорт қилувчи компания Ўзбекистонга COVID-19’ни даволашда ишлатилаётган 56109 қути вирусга қарши «Ремдесивир» дорисини импорт қилган. Дориларнинг умумий қиймати икки миллион доллардан ошган.
Агентликнинг ҳисоб-китобига кўра, мазкур дорининг энг паст чакана нархи 457 минг сўмни ташкил қилиши керак, энг баланд нарх эса 3,83 миллион сўмга тенг бўлиши керак. Ўртача чакана нарх эса 1,066 миллион сўмни ташкил этиши лозим.
«Мазкур фарқ маҳаллий импортчилар томонидан декларация қилинган турли нархлар билан изоҳланади, шунингдек, ишлаб чиқарувчи давлатга боғлиқ», — дейилади агентлик хабарида.
Таъкидланишича, энг юқори импорт нархи Pharmhealth компаниясида кузатилган бўлиб, Грузияда ишлаб чиқарилган «Ремдесивир» дорисининг бир қутиси 270 доллардан олиб келинган. Энг паст импорт нархи эса Serene Pharma компаниясида бўлган — Ҳиндистонда ишлаб чиқарилган «Ремдак» препаратининг бир қутиси 45 доллардан импорт қилинган.
Мазкур давр мобайнида Нидерландияда ишлаб чиқарилган гриппга қарши «Инфлювак» вакцинасининг қиймати тахминан 800 минг доллар бўлган 155490 қутиси иккита импорт қилувчи компания томонидан Ўзбекистонга олиб келинган.
Вакцинанинг энг паст чакана нархи 69 минг сўмдан ошмаслиги керак, энг баланд нарх эса 102 минг сўм бўлиши керак. Ўртача чакана нарх эса 86 минг сўмни ташкил қилади. Энг баланд нарх тўрт валентли вакцинада кузатилган, энг паст нарх эса уч валентли вакцинага тўғри келган.
Агентлик дори воситаларининг чегаравий чакана нархларини ҳисоб-китоб қилишда, улгуржи омборлардаги дори воситалари қолдиқларини ва келгуси импорт прогнозларини ўрганишда давом этади, шунингдек, нархларнинг ошиб кетишига қарши кураш бўйича чоралар кўради.
Агентликнинг таъкидлашича, дорихоналар томонидан лицензия талаблари ва шартларини, шу жумладан дори воситалари нархларини шакллантириш тартибини тизимли равишда (бир йил давомида икки марта ва ундан ортиқ) бузиш қўпол қоидабузарлик ҳисобланади ва лицензия бекор қилиниши учун асос бўлиши мумкин.
Агентлик истеъмолчиларни дори воситаларининг қиммат нархларда сотилиши ҳолатлари ҳақида 1159 ишонч телефонига ва агентликнинг +998712074600 ягона рақамига хабар беришга чақирмоқда.
Аввалроқ Соғлиқни сақлаш вазирлиги Ўзбекистонда COVID-19 касаллигига чалинган беморларни даволашда «Ремдесивир» ва «Фавипиравир» дори воситаларидан фойдаланилаётганини маълум қилганди.
Соғлиқни сақлаш вазирлиги хабарига кўра, ҳозирга қадар касалликнинг бошланғич босқичидаги беморлар учун 17 минг нафар беморга мўлжалланган 17 минг дона «Фавипиравир» ва оғир ҳолатдаги 2500 нафар беморга мўлжалланган 15 минг дона «Ремдесивир» дори воситаси даволаш муассасаларига бепул етказиб берилган.
Изоҳ (0)