Тожикистон етти ойлик танаффусдан кейин Хитой билан доимий авиақатновларни қайта тикламоқда. Октябрь ойидан Душанбе—Урумчи йўналишидаги рейслар тикланади. Бу ҳақда Тожикистон Фуқаро авиацияси агентлигига таяниб, Asia Plus хабар берди.
Маълум қилинишича, рейсларни қайта тиклаш ҳақидаги қарор республика штаби томонидан қабул қилинган ва парвозлар коронавирус пандемияси билан боғлиқ барча санитария-гигиена меъёрларига амал қилган ҳолда амалга оширилади.
Хабар берилишича, йўловчилар сонига боғлиқ равишда Душанбе—Урумчи йўналиши бўйича тўғридан-тўғри рейслар икки ҳафтада бир марта Тожикистоннинг Somon Air авиакомпанияси ва Хитойнинг China Southern Airlines авиакомпанияси томонидан амалга оширилади. Йўловчилар самолётга чиқишдан олдин уларда коронавирус йўқлигини кўрсатувчи ПЗР тестининг кўпи билан 72 соат олдин берилган натижасини тақдим этиши керак бўлади.
Душанбедан Урумчига амалга ошириладиган биринчи рейснинг санаси маълум қилинмаган, бироқ рейснинг октябрь ойи ўртасида амалга оширилиши кутилмоқда.
Агентлик раҳбарининг маълум қилишича, Тожикистон ҳукумати Душанбе ва Тошкент ўртасидаги тўғридан-тўғри авиақатновларни тиклаш масаласини ҳам кўриб чиқмоқда.
Бундан ташқари, 8 октябрдан бошлаб Душанбе—Истанбул—Душанбе йўналишида доимий парвозларни амалга ошириш бошланади.
Аввалроқ Тожикистонда Ўзбекистон билан чегараларни очиш масаласи кўриб чиқилаётгани ҳақида хабар берилганди.
Изоҳ (0)