“Samarqandda koronavirusdan davolanayotganlar rasmiy statistikasi 10 baravar kamaytirib ko‘rsatilgan. Boshqa viloyatlarda ham shu ahvol” — Akmal Burhonov

Samarqand viloyatida COVID-19 infeksiyasidan davolanayotgan bemorlar statistikasi o‘n baravar kamaytirib ko‘rsatilgan. Bu haqda Korrupsiyaga qarshi kurashish agentligi direktori Akmal Burhonov 6-oktabr kuni agentlikda tashkil etilgan matbuot anjumanida ma’lum qilgan.

Burhonovning so‘zlariga ko‘ra, Korrupsiyaga qarshi kurashish agentligi Inqirozga qarshi kurashish jamg‘armasi mablag‘larining sarflanishi bo‘yicha eng ko‘p murojaat kelib tushayotgan hududlardan biri hisoblangan Samarqand viloyatida o‘rganish o‘tkazgan. Bunda viloyatda koronavirus statistikasi noto‘g‘ri yuritilayotgani borasidagi murojaatlar ham ko‘rib chiqilgan.

Statistika masalasiga kelsak, uning noto‘g‘ri ekanini hamma aytyapti. 5-oktabr soat 23:30 holatiga ko‘ra Samarqand viloyatida 2160 kishida koronavirus qayd etilgan, 2017 nafari sog‘aygan. Ya’ni, 6-oktabr holatiga 143 kishi kasal, deyilgan. Bizdagi ma’lumotlar bo‘yicha esa bugungi kunda Samarqandda shifoxonalarda davolanayotgan bemorlar soni 1155 nafar. 10 baravar qisqartirib ko‘rsatishning nima keragi bor?

Bu balki korrupsiya emasdir, ammo sababini biz o‘rganishimiz kerak. Yana bir bor aytaman -- bu Samarqand viloyati misolidagi holat. Hamma viloyatlarda shu ahvolligini aniq ayta olishim mumkin.

Akmal Burhonov, Korrupsiyaga qarshi kurashish agentligi direktori

Avvalroq “Yuksalish” umummilliy harakati koronavirus bo‘yicha haqiqiy statistikani yashirmaslikka chaqirgan edi. Harakat vakillari agar shu kecha-kunduzda O‘zbekistonda 3 mingga yaqin koronavirusga chalingan bemor bo‘lsa, u holda “nega hali ham shifoxonalarda joy yetishmayotgani haqida xabarlar kelmoqda va zudlik bilan yangi joylar tashkil etilmoqda?”, deya savol qo‘ygan edi.

Qayd etish joiz, O‘zbekiston Sog‘liqni saqlash vazirligi (SSV) rasmiylari davlat koronavirus statistikasiga doir ma’lumotlarni yashirish yoki ularni buzib ko‘rsatishdan manfaatdor emasligini muntazam ta’kidlab keladi. Shunga qaramay, SSV tomonidan yuritilayotgan statistika shubhali va ishonchga sazovor emasligi haqida “Daryo” bir necha bor chiqish qilgan.Xususan, Toshkent viloyatida koronavirusga chalingan o‘nlab bemorlar kasallik qayd etilganidan atigi 2-3 kun o‘tib “sog‘ayib chiqa boshlagani”, o‘qituvchilar orasida qayd etilayotgan kasallanish holatlari rasmiy statistikaga kiritilmayotgani haqida xabar berilgan edi. Vazirlik 22-sentabrdan buyon koronavirus oqibatida vafot etganlarning yoshi, jinsi, yashash joyiga oid ma’lumotlarni e’lon qilmayapti (bu ma’lumotlar nega maxfiylashtirilgani yuzasidan biror izoh berilmagan).