Shavkat Mirziyoyev 7-oktabr kuni Rossiya prezidenti Vladimir Putin bilan telefon orqali muloqot qildi, deb xabar bermoqda Prezident matbuot xizmat. Suhbat avvalida davlat rahbari Rossiya yetakchisini tug‘ilgan kuni bilan tabriklab, unga mustahkam sog‘liq, baxt-saodat va muvaffaqiyat, Rossiya xalqiga esa tinchlik-osoyishtalik va ravnaq tiladi.
Xabarda aytilishicha, muloqot chog‘ida O‘zbekiston—Rossiya strategik sheriklik va ittifoqchilik munosabatlarini yanada mustahkamlashning dolzarb masalalari ko‘rib chiqildi, xalqaro va mintaqaviy kun tartibi yuzasidan fikr almashildi. 2020-yil iyul oyida Moskva shahridagi uchrashuv chog‘ida erishilgan kelishuvlarga muvofiq bo‘lajak oliy darajadagi muloqotlarga tayyorgarlik ko‘rish bo‘yicha birgalikdagi faol ishlarni davom ettirishga alohida e’tibor qaratildi.
Pandemiya oqibatlariga qaramay, o‘zaro tashriflar amalga oshirilayotgani, O‘zbekiston va Rossiyaning yetakchi kompaniya va korxonalari o‘rtasidagi investitsiyaviy hamkorlik ko‘lami va tovar ayirboshlash hajmi kengayib borayotgani mamnuniyat bilan qayd etildi. Ta’lim va madaniy almashinuvga doir muhim dasturlar amalga oshirilmoqda.
Shavkat Mirziyoyev koronavirusga qarshi kurashishda ko‘rsatilgan amaliy yordam, jumladan, Rossiyadan vrach va mutaxassislarning katta guruhi O‘zbekistonga jo‘natilgani uchun samimiy minnatdorlik bildirdi.
Davlat rahbarlari ikki mamlakat vazirlik va idoralari darajasida, shu jumladan joriy oyda bo‘lib o‘tadigan Hukumatlararo komissiyaning navbatdagi majlisi doirasida yaqindan muvofiqlashuv va hamkorlikni davom ettirish muhimligini ta’kidladi. Bunda, avvalo, ko‘p qirrali munosabatlarning ustuvor dastur va loyihalarini, biznes va hududlar kooperatsiyasini kuchaytirish bo‘yicha uzoq muddatli “yo‘l xaritasi” tayyorlashni jadallashtirish nazarda tutiladi.
Davlat rahbarlari, shuningdek, mintaqada yuzaga kelayotgan vaziyatni muhokama qildi, bo‘lajak tadbirlar rejasini ko‘rib chiqdi.
Avvalroq Shavkat Mirziyoyev Tojikiston prezidenti Emomali Rahmonni tug‘ilgan kuni bilan tabriklab, unga bo‘lajak prezidentlik saylovlarida muvaffaqiyat tilagani, Germaniya prezidenti Frank Valter Shtaynmayerni milliy bayram – Germaniya birligi kuni bilan, Janubiy Koreya prezidenti Mun Chje Inni mamlakat tashkil topgan kun va Chusok bayrami bilan tabriklab, maktub yo‘llagani xabar berilgan edi.
Izoh (0)