Oliy va o‘rta maxsus ta’lim vazirligining ma’lum qilishicha, 2020/2021-o‘quv yiliga respublika oliy ta’lim muassasalarining magistratura mutaxassisliklariga kirish imtihonlari natijalari tegishli oliy ta’lim muassasalarining rasmiy veb-saytlarida e’lon qilinadi.
Respublika oliy ta’lim muassasalarining magistratura mutaxassisliklariga abituriyent sifatida hujjat topshirib, kirish imtihonlarida (onlayn test sinovlarida) ishtirok etgan abituriyentlar o‘zlarining natijalari bilan tegishli oliy ta’lim muassasasining rasmiy veb-sayti orqali 7-oktabr kuni soat 17:00 dan boshlab tanishishlari mumkin.
Talabalikka tavsiya etilgan abituriyentlardan tegishli oliy ta’lim muassasalariga murojaat qilish so‘ralgan.
Eslatib o‘tamiz, o‘qishning magistratura ta’lim shakli bo‘yicha 2020/2021-o‘quv yili uchun imtihonlar 8–20-sentabr kunlari bo‘lib o‘tdi. Ushbu o‘quv yilida magistraturaga 73 ming abituriyent hujjat topshirgan bo‘lib, imtihon 13 ta hududdagi 19 ta OTMda, onlayn shaklda o‘tkazilgan.
2020-yilda O‘zbekistondagi oliy ta’lim muassasalariga magistraturaga 10 425 ta o‘rin ajratilgan. Shundan 5475 nafari grant, 4950 nafari to‘lov-kontrakt asosida tahsil oladi. 2020/2021-o‘quv yili magistrantlar uchun ham masofaviy shaklda boshlanadi.
Izoh (0)