«Навбаҳор»нинг стратегияси ўзгаради, 2021 йилдан жамоа аъзолари фақат маҳаллий ёшлардан иборат бўлади

Наманганнинг «Навбаҳор» жамоасида катта ўзгаришлар рўй бериши кутилмоқда.

7 октябрь куни Наманган вилояти ҳокими вазифасини бажарувчи, вилоят футбол ассоциацияси президенти Шавкат Абдураззоқов клуб қароргоҳида йиғилиш ўтказди. Унда вилоят раҳбари «Навбаҳор» футбол клубининг стратегияси ўзгариши ва жамоа бундан кейин маҳаллий футболчилар ёрдамида шакллантирилишини маълум қилди.

Гарчи таркиб бўйича Суперлиганинг унча-бунча жамоасидан қолишмаса-да, анча маҳоратли ҳамда тажрибали футболчиларга эга бўлса-да, «Навбаҳор» сўнгги 9 ўйиндан буён ғалаба қозона олмаяпти. Бунга жамоа мураббийлари футболчиларнинг кўпчилиги коронавирусга чалингани ва ҳоказо баҳоналар келтирди.

Жорий  мавсум бошида жамоанинг олдига Осиё Чемпионлар Лигаси йўлланмасини қўлга киритиш вазифаси қўйилганди. Бироқ жамоа кўп очко йўқотди.

Сўнгги 3 йил давомида, яъни 2017 йилдан 2020 йилнинг мартига қадар «Навбаҳор» президенти сифатида фаолият олиб бордим. Ўша пайтдан, яъни 2017 йилдан бошлаб жамоада ёш футболчиларга эътиборни кучайтирганимизда, ҳозиргача 3 йил давомида  анча иқтидорли футболчилар етишиб чиққан бўларди.

Бироқ биз «Навбаҳор»ни юксалтириш, жамоанинг совриндорлар сафидан жой олиши, ОЧЛ йўлланмасини қўлга киритиши учун ҳаракат қилдик. Лекин бу кутилган самарани бермади. Энди «Навбаҳор»нинг стратегияси ўзгаради ва асосий эътибор маҳоратли ёшларга қаратилади.

2021 йилдан жамоа шарафини фақат маҳаллий ёшлар ҳимоя қилади. Биз барча наманганлик иқтидорли, ёш футболчиларни қўллаб-қувватлаймиз, инвестицияни маҳаллий ёш, иқтидорли футболчиларни етиштириб чиқариш учун йўналтирамиз.

Намангандаги барча футбол мактаблари ва академиялари энди «Навбаҳор» тасарруфига ўтади ҳамда ушбу таълим масканларидаги барча футболчилар энг аввало «Навбаҳор» билан шартнома имзолайди.

Шавкат Абдураззоқов, Наманган вилояти ҳокими вазифасини бажарувчи