Nishon hokimi matbuot kotibiga faoliyatida foydalanish uchun ish qurollari olib berishga va’da berdi

Qashqadaryo viloyatining Nishon tumani hokimi Muxtor Hayitmurodov matbuot kotibiga faoliyatida foydalanish uchun ish qurollari olib berilmaganini, shu bois ham hokimlik faoliyati yoritilishi qoniqarsiz ekanligini tan oldi. Bu haqda Xalq deputatlari tuman kengashining navbatdagi sessiyasida ma’lum qilindi deya xabar berdi “Daryo” muxbiri.

Ma’lum bo‘lishicha, Nishon tumani respublikada 33 ta “qizil” tumanning biri sifatida qayd etilgani uchun 2020-yil 5-oktabr kuni Xalq deputatlarining navbatdagi sessiyasi bo‘lib o‘tgan. Unda tuman hokimi yo‘l qo‘yilgan kamchiliklar uchun uzr so‘rab, ko‘plab va’dalar bergan.

Hokim jurnalist va blogerlar bilan muloqotda esa bloger Namoz Choriyevning savoliga javoban matbuot kotibiga shart-sharoit yaratib bermaganini tan olgan va o‘n-o‘n besh kunda axborot xizmati faoliyati uchun zarur bo‘lgan barcha ish qurollarini olib berishga va’da bergan.

“Dehqonobod, Koson va Yakkabog‘ tumanlari, shuningdek, Shahrisabz shahar hokimliklarining axborot xizmatiga havas qilaman. Hokim qayerga borsa, biroz o‘tib Telegram kanallar va OAVda yoritiladi. Bizda esa men kuniga 20-30 nafar tadbirkor bilan gaplashsam ham yoritilmaydi. Chunki axborot xizmatimizda yetarli darajada imkoniyat yo‘q, sharoit yaratilmagan. Bunda bizning aybimiz bor, qunt qilmaganmiz”, — dedi Muxtor Hayitmurodov.

Hokim OAV vakillari bilan suhbat chog‘ida hokimlik axborot xizmati faoliyatini yaxshilash maqsadida o‘n besh kun muddat ichida barcha kerakli ish qurollarini olib berishga va’da berdi.

Eslatib o‘tamiz, Prezidentning 2019-yil 27-iyundagi “Ommaviy axborot vositalari mustaqilligini ta’minlash hamda davlat organlari va tashkilotlari axborot xizmatlari faoliyatini rivojlantirish bo‘yicha qo‘shimcha chora-tadbirlar to‘g‘risida”gi qaroriga ko‘ra, tuman hokimligi axborot xizmati rahbari bir vaqtning o‘zida hokimning matbuot kotibi hisoblanib, axborot siyosati masalalari bo‘yicha rahbarning maslahatchisi maqomiga ega hamda mehnatga haq to‘lash, tibbiy va transport xizmati ko‘rsatish shartlariga ko‘ra hokim o‘rinbosariga tenglashtirilgan.

Qashqadaryoda faqatgina Dehqonobod tumani hokimligi axborot xizmatiga xizmat avtomobili berilgan.