Buyuk Britaniyaning Linkolnshire shahrida joylashgan hayvonot bog‘i xodimlari qushning bunday iqtidori haqida tasavvur ham qilmagandi. 9 yoshli Chiko ismli to‘tiqush Beyonsening 2008-yil taqdim etgan “If I were a boy” qo‘shig‘ini kuylashni boshlaganda hamma hayratda qoldi.
To‘tiqushning tasvirga olingan ijrolaridan biri internet tarmog‘ida tarqaldi, shuningdek, hayvonot bog‘ining Facebook sahifasidagi videolavha 1000 dan ortiq foydalanuvchi tomonidan ulashildi. Endi hayvonot bog‘iga tashrif buyurvchi mehmonlar shunchaki Chikoning qo‘shiqlarini tinglash uchun keladi.
“Men 25 yildan buyon to‘tiqushlar bilan ishlayman, ammo ular meni hech qachon bunchalik hayratda qoldirmagan. Chikoning mashhurligi tufayli hayvonot bog‘ida ijtimoiy masofani saqlash bilan bog‘liq muammolarga ham duch keldik”, − deydi Linkolnshire yovvoyi tabiat bog‘i direktori Stiv Nikols to‘tiqushning qobiliyatini sharhlar ekan.
To‘tiqushning repertuari faqatgina Beyonsening qo‘shig‘i bilan cheklanmaydi. Xodimlarning aytishicha, Ledi Gaga va Keti Perrining ijodidan mashhur qo‘shiqlarni ham kuylaydi.
Chiko qo‘shiqlarni to‘liq kuylamaydi, lekin tashrif buyuruvchilarni xursand qilish uchun bir nechta misralarni ijro etadi. Chunki qush ohangdan tashqari ijrochilarning ovozidan ham juda aniq nusxa ko‘chiradi.
Ma’lumotlarga ko‘ra, Chikoning Instagram’da ham shahsiy sahifasi ochilgan, hayvonot bog‘i xodimlarining va’dasiga ko‘ra, u yerda Chikoning mini konsert dasturlari yuklanib boriladi. Shuningdek, uning sahifasiga allaqachon 8 mingdan ortiq kishi obuna bo‘lishga ulgurgan.
Aytgancha, bu karantin davrida tinglanayotgan yagona qush emas. Aynan shu hayvonot bog‘ida bir nechta qushlarni mehmonlarga ko‘rsatish taqiqlangan edi. Sababi ular haqorat qilishni o‘rganib, oilaviy tashrif buyurgan mehmonlarni hayratda qoldirgan edi.
Mavzuga doir:
Izoh (0)