O‘zbekistonda iqtisodiy o‘sish 2020-yilning birinchi yarmida 0,2 foizgacha pasayib, asosan qishloq xo‘jaligi (2,8 foiz) va qurilish (7,3 foiz) sohalaridagi o‘sish hisobiga ijobiy ko‘rsatkichni saqlab qoldi. Boshqa sohalarda ham pasayish kuzatildi. Bu haqda Yevropa tiklanish va taraqqiyot bankining (YeTTB) yangi makroiqtisodiy hisobotiga asoslanib “Gazeta.uz” xabar berdi.
Hisobotga ko‘ra, sanoat va gaz qazib olish 1,9 foiz va 17,1 foizga kamaygan. Mehmonxona biznesi va chakana savdoda 1,1 foizga, transport va saqlash, axborot va aloqada — 3,2 foizlik pasayish kuzatildi. Yanvar–iyul oylarida ishsizlik 13,2 foizgacha o‘sdi (bir yil oldin — 9,1 foiz edi), real daromadlar esa 1,7 foizga kamaydi.
Yalpi talab fonida inflyatsiya avgust oyida 11,7 foizgacha pastladi (2019-yil avgustda — 16,5 foiz edi), bu Markaziy bankni qayta moliyalash stavkasini yillik 15 foizdan 14 foizgacha tushirishga majbur qildi.
Hisobotda ta’kidlanishicha, Inqirozga qarshi jamg‘arma (YaIMning 1,5 foizga yaqini) tashkil etganiga qaramay, mamlakat kuchli tashqi bosimni boshdan kechirmoqda. Yilning yetti oyida import taxminan 18 foizga, eksport esa 21 foizga kamaygan. Rossiya va Qozog‘istondagi iqtisodiy faollikning sustlashuvi va yanvar—iyul oylarida pul o‘tkazmalarining 7 foizga pasayishi tufayli tashqi muvozanat yanada yomonlashdi.
Umuman olganda, YeTTB bu yil real YaIMning 2 foizga qisqarishini prognoz qilmoqda. Tahlilchilar eksport va ichki talabning tiklanishi bilan bog‘liq holda 2021-yilda 4,5 foizga o‘sishni kutmoqda.
Avvalroq YeTTB eksportning tiklanishi va ichki talabning o‘sishi sharoitida 2021-yilda O‘zbekiston YaIM 6,5 foizga o‘sishini prognoz qilgandi.
Izoh (0)