Surxondaryo viloyat hokimligi Qumqo‘rg‘on tumanidagi ko‘prik haqidagi maqolaga munosabat bildirib, sifatsiz ko‘prik qurgan quruvchi ishini dastlab jinoyat ishi ochishni rad etgan transport prokuraturasi o‘rganayotganini ma’lum qildi.
Hokimlikning yozishicha, umumiy foydalanishdagi davlat ahamiyatiga ega 4R-105 Darband— Boysun—Elbayon avtomobil yo‘lining Qumqo‘rg‘on tumani hududidan o‘tuvchi 70-89 km hamda avtomobil yo‘lining 76-km qismidagi “Polvontosh” selgasidagi ko‘prik 2013-yilda sodir bo‘lgan tabiiy ofat oqibatida zarar ko‘rgan. Qumqo‘rg‘on tuman hokimining 2013-yil 5-sentabrdagi qaroriga asosan mazkur ko‘prikni qurish mas’uliyati “Bahrom universal qurilish” MChJga yuklatilgan.
2014—2018-yillarda ko‘prikning asosiy qurilish ishlari yakunlanib, avtotransport vositalari harakati uchun ochilgan. Ammo buyurtmachi viloyat avtomobil yo‘llari hududiy Bosh boshqarmasining rasmiy ogohlantirish xatlari va qonunda belgilangan tartibda qo‘llagan jarima tadbirlariga qaramasdan pudratchi “Bahrom universal qurilish” MChJ tomonidan loyihada ko‘zda tutilgan qoldiq ish hajmlari – qirg‘oqni mustahkamlash ishlarini bajarish uzoq vaqt paysalga solib kelingan.
“Oqibatda 2019—2020-yillar, jumladan, joriy yilning mart—aprel oylarida sel oqimi odatdagi hajmga nisbatan uch-to‘rt barobar ko‘p kelganligi natijasida ko‘prikka jiddiy zarar yetgan”, — deyiladi hokimlik munosabatida. — Jumladan, mazkur ko‘prik joylashgan sel yo‘lining mavjud suv sathi uch yil davomida o‘rtacha 5—6 metrgacha pasayishi natijasida ko‘prikning 3-tayanch qismi 5-6 metrgacha ochiq holga kelgan. Joriy yilning aprel—may oylarida o‘ta kuchli sel kelishi natijasida ko‘prikning 3-tayanchi loyihaviy holati o‘zgarib, cho‘kish sodir bo‘lgan”.
Shundan so‘ng hududda yashovchi aholiga qatnov uchun yetarli sharoit yaratish maqsadida viloyat avtomobil yo‘llari Bosh boshqarmasi hamda tuman yo‘llardan foydalanish korxonasi tomonidan ko‘prikda harakatlanish cheklanib, vaqtincha aylanib o‘tish yo‘li qurilgan.
“Daryo” muxbiri bilan suhbatlashgan aholi vakillari esa, vaqtincha aylanib o‘tish yo‘li ham aholi tashabbusi bilan qurilganini aytgandi.
Bu haqda ma’lumot bergan O‘tkir Xolmatov aylanma yo‘l aholida mavjud bo‘lgan texnikalar yordamida qilinganini, sel kelgach sel o‘tish yo‘li yuvib ketilganini, shundan so‘ng mas’ullar sel o‘tishi uchun truba keltirib o‘rnatib, budjetdan yana 500-600 million so‘m olganini aytmoqda.
Avvalroq, Surxondaryo viloyat prokuraturasi 6,5 milliard so‘mga qurilib, 1 yil-u 7 oy xizmat ko‘rsatgan ko‘prik masalasiga munosabat bildirib, “Termiz transport prokuraturasining 2020-yil 18-iyun kuni O‘zbekiston Respublikasi Jinoyat protsessual kodeksining 83-moddasi 2-bandiga asosan jinoyat ishi qo‘zg‘atishni rad etish haqida qarori bekor qilinib, 2020-yil 29-sentyabr kuni tergovga qadar tekshiruv harakatlari boshlab yuborildi”, degandi.
Viloyat hokimligi esa o‘sha tekshiruv Termiz transport prokuraturasi tomonidan olib borilayotganini ochiqlagan.
Hokimlikning axborot berishicha, pudratchiga nisbatan ta’sir choralari samarasiz qolayotganligi sabab viloyat avtomobil yo‘llari Bosh boshqarmasi viloyat prokuraturasiga shikoyat qilgan. Shunga ko‘ra, mazkur ko‘prik qurilishi boshqa pudratchiga berilgan.
“Sevimli” kanalining “Zamon” informatsion dasturi jurnalistlarining ma’lumot to‘plashicha, mazkur ko‘prik qurilishiga yana 9 milliard so‘m mablag‘ ajratilgan.
Surxondaryo viloyat hokimligi o‘z munosabatida aholining 19 km yo‘l sifatsiz qurilayotgani haqidagi shikoyatiga ham to‘xtalib, “mazkur holat viloyat avtomobil yo‘llari hududiy Bosh boshqarmasi, Qumqo‘rg‘on tuman yo‘llardan foydalanish unitar korxonasi, loyihachi korxona, ommaviy axborot vositalari hamda mahalliy aholi vakillari ishtirokida joyida o‘rganib chiqildi”, — deydi.
Aytilishicha, o‘rganish jarayonida ta’mirlash ishlari me’yoriy hujjatlarga asosan amalga oshirilayotgani aytilib, mutaxassislar bajarilgan ishlarning sifati to‘g‘risida OAVga qo‘shimcha ma’lumot bergan.
Hokimlikning yozishicha, avtomobil yo‘llarida amalga oshirilayotgan ta’mirlash ishlari sifati aloqador tashkilotlar va viloyat avtomobil yo‘llari hududiy Bosh boshqarmasi tomonidan to‘liq nazoratga olingan.
Izoh (0)