2020-yilning 3-oktabr kuni Bosh prokuratura huzuridagi Majburiy ijro byurosining Namangan viloyat boshqarmasida brifing bo‘lib o‘tdi, deb xabar bermoqda “Kun.uz”.
Xabarga ko‘ra, brifingda 29-sentabr kungi ijro harakatlari davomida marhuma Gulandom Dadaboyevaning o‘z joniga qasd qilishi bilan bog‘liq masalalar haqida so‘z borgan. Tadbirda byuroning Namangan viloyat boshqarmasi va shahar bo‘limi Namangan shahar IIB, viloyat favqulodda vaziyatlar boshqarmasi mas’ul xodimlari hamda ommaviy axborot vositalari, elektron nashrlar vakili ishtirok etgan.
“Ma’lumki, 2020-yilning 29-sentabr kuni Namangan shahrida istiqomat qilgan 35 yoshli marhuma Gulandom Dadaboyeva ijro harakatlari davrida o‘z ustiga benzin quyib yoqishi natijasida o‘z joniga qasd qilib, vafot etgan edi.
Ushbu holat ijtimoiy tarmoqlar va jamoatchilik e’tiborida bo‘ldi.
Voqeani kuzatib borganlar uydan chiqishi lozim bo‘lgan marhumaning onasi Muhabbat Dadaboyevaning foydasiga qarzdor F.Nasriddinovadan 13 ming AQSh dollariga teng 131 million 991 ming so‘mni undirish to‘g‘risidagi hujjat ijrosi hozirda ta’minlanmayotganligi haqida aytib o‘tilgan edi”, – degan brifingda ishtirok etgan rasmiylar.
Brifingda MIB Namangan viloyati va shahar bo‘limi mas’ullari hodisa yuzasidan izoh bergan.
“Mas’ul xodimlar ushbu voqea tashvishli holat bo‘lganligi va marhuma Gulandom Dadaboyevaning oila a’zolari va yaqinlariga hamdardlik bildirib o‘tdi.
Haqiqatan ham, jinoyat ishlari bo‘yicha Namangan shahar sudining 2020-yil 9-iyundagi ijro hujjatiga asosan F.Nasriddinovadan undiruvchi M.Dadaboyeva foydasiga 13 ming AQSh dollariga teng bo‘lgan qiymatda 131 million 991 ming 470 so‘m moddiy zarar undirish to‘g‘risidagi ijro hujjati bo‘lim ish yurituviga 27-iyunda kelib tushgan.
Qarzdor F.Nasriddinovaning egalik huquqi asosida tegishli bo‘lgan mol-mulklarni aniqlash maqsadida tegishli moliya, kredit va ro‘yxatdan o‘tkazuvchi tashkilotlardan olingan ma’lumotlarga ko‘ra, qarzdorning nomida hech qanday mol-mulklar aniqlanmagan.
Hozirda qarzdor F.Nasriddinova Namangan viloyati Oliy va o‘rta-maxsus ta’lim boshqarmasiga qarashli Namangan shahar “Gulbog‘” MFY hududida joylashgan Namangan shahar 1-sonli Pedagogika kollejining yotoqxonasining bir xonasida (qo‘shimcha xonasi yo‘q), olti nafar farzandi bilan birgalikda yashayotganligi hamda yashash ehtiyojidan ortiqcha bo‘lgan mol-mulklar yo‘qligi aniqlangan.
Davlat ijrochisi tomonidan belgilangan moddiy zarar summalarini to‘lash talab etilishi bo‘yicha og‘zaki va rasman 18-avgustda ogohlantirilib, 28-avgustda hamda 12-sentabrda holat yuzasidan tushuntirish xati olingan.
Bundan tashqari, 2020-yil sentabr oyi davomida qarzdorning yashash sharoiti yana o‘rganilganda, ushbu yotqoxonadagi fuqaro va mas’ul xodimlar F.Nasriddinova 2020-yilning fevral oyidan beri yashayotganligi, turmush o‘rtog‘i yo‘q, olti nafar farzandning boquvchisi o‘zi ekanligini, sharoiti og‘irligi sababli, F.Nasriddinova yashayotgan xona esa M.Akramovaning o‘g‘li A.Valijonovga tegishli ekanligi, F.Nasriddinovaning boshqa boradigan joyi yo‘qligi uchun M.Akramova unga vaqtincha yashash uchun ruxsat berganligi ma’lum bo‘lgan.
(Bu holat yotoqxonada yashovchi fuqaro va yotoqxona mas’ullaridan olingan tushuntirish xatlari bilan tasdiqlangan).
Holat bo‘yicha xolislar ishtirokida dalolatnoma rasmiylashtirilgan va xonadon fotosuratga olingan hamda ijro ish hujjatlariga qo‘shilgan.
Davlat ijrochisining qonunchilikda yo‘l qo‘yiladigan barcha harakatlari natijasiz bo‘lganligi sababli ijro hujjatining ijrosini ta’minlash imkoni bo‘lmagan. Shunga qaramasdan ijro harakatlari davom ettirilmoqda”, – deyilgan MIB matbuot xizmatining ma’lumotida.
Avvalroq marhuma Gulandom Dadaboyeva o‘ziga o‘t qo‘yib shu tarzda ikki yarim yil muqaddam sotib olingan uyidan majburan chiqarmoqchi bo‘lgan MIB xodimlariga noroziligini bildirgan ayol vafot etgani, keyinchalik voqea yuzasidan jinoyat ishi qo‘zg‘atilgani haqida xabarlar berilgandi.
Izoh (0)