Қибрайда ўзига таниш аёлнинг уйида босқинчилик содир этган эркак 3 йилдан сўнг ушланди

Тошкент вилоятининг Қибрай туманида уч йил аввалги босқинчилик жинояти фош этилди, деб хабар бермоқда ИИВ ҳузуридаги Тергов департаменти.

Маълум бўлишича, 2017 йил 24 май куни Қибрай тумани, «Янгиобод» ҚФЙда яшовчи 35 ёшли аёл Л.П. ўзига аввалдан таниш бўлган У исмли шахс билан кўчада учрашиб, сўнг уни уйига таклиф қилиб, биргаликда тамадди қилган. Шундан сўнг У исмли шахс стол устида турган болға билан Л.П.нинг елка қисмига уриб, ювиниш хонасига олиб кирган ва юзига уриб, тан жароҳати етказгани, бўйнидан бўғгани сабабли аёл хушини йўқотган.

Бундан фойдаланган У исмли шахс Л.П.нинг уйидан нархи 400 долларга тенг HP русумли ноутбук, 100 000 сўмлик Nokia-1600 русумли уяли телефон аппарати ва 300 долларга тенг Samsung Galaxy Таb-3 планшетини қўлга киритиб, ҳодиса жойидан яширинган.

Ҳолат юзасидан Қибрай тумани ИИБ ҳузуридаги Тергов бўлими томонидан Жиноят кодексининг 164-моддаси 2-қисми «а» банди (босқинчилик) билан жиноят иши қўзғатилган. Дастлабки тергов жараёнида ушбу жиноятни содир этган фуқаронинг шахсини аниқлаш имкони бўлмаганлиги сабабли жиноят иши Жиноят-процессуал кодексининг 364-моддаси 1-қисми 1-бандига (дастлабки терговни тўхтатиш асослари ва тартиби) асосан ҳаракатдан тўхтатилган.

Жиноят иши бўйича олиб борилган тезкор-қидирув ҳаракатлари давомида мазкур жиноятни содир этган У исмли шахс Наманган вилоятида яшовчи 28 ёшли У.Й. эканлиги аниқланиб, у Фарғона вилояти Боғдод тумани ҳудудида ушланган ҳамда Қибрай тумани ИИБ ҳузуридаги Тергов бўлимига олиб келинган. Жиноят иши бўйича дастлабки тергов қайта тикланиб, У.Й. гумон қилинувчи тариқасида жалб қилинган ва процессуал тартибда ушланган.

Ҳозирда дастлабки тергов ҳаракатлари давом эттирилмоқда.