Forbes eng ko‘p pul ishlab topgan aktrisalar ro‘yxatini e’lon qildi. Sofiya Vergara reytingda birinchi deb topilgan

Forbes jurnali eng ko‘p haq to‘langan aktrisalarning navbatdagi reytingini e’lon qildi. 2019-yilda ikkinchi o‘rinni egallagan Sofiya Vergara bu yilgi ro‘yxatda yetakchilik qilgan, deb yozadi Esquire.

Ma’lum qilinishicha, komediya janrida suratga olingan “Zamonaviy oila” serialida suratga tushgan aktrisaning daromadi 43 million dollarni tashkil qiladi. Wallmart kompaniyasi uchun jinsilar ishlab chiqarishni boshlagan Vergara Rooms To Go mebellar do‘koni bilan ham hamkorlik qiladi.

Asosiy daromadini Marvel tomonidan suratga olingan “Qizil xabar” filmidagi roli sabab qo‘lga kiritgan Anjelina Joli esa 35,5 million dollar bilan ikkinchi o‘ringa loyiq deb topilgan. Daromadining katta qismini striming servis bilan hamkorlik asosida ishlab topgan “Mo‘jiza ayollar” yulduzi Gal Gadot esa 31,5 million dollar daromad bilan ro‘yxatda uchinchi bo‘lgan.

Aktrisa Melissa Makkarti 25 million dollar bilan to‘rtinchi, Meril Strip esa undan bir million kam daromad bilan beshinchi bo‘lgan. 22,5 million dollarga ega bo‘lgan Emili Blant oltinchilikni, Nikol Kidman esa undan yarim million kam mablag‘ bilan yettinchilikni egallagan. Ellen Pompeo 19 million daromadi sabab sakkizinchi o‘ringa, Elizabet Moss esa 16 million dollar bilan to‘qqizinchi o‘ringa loyiq deb topilgan. 15,5 million dollar haq to‘langan Viola Devis ro‘yxat o‘ntaligiga yakun yasagan.

Qayd qilinishicha, reytingdan o‘rin olgan barcha aktrisalar oldingi yildagi yetakchilardan 20 foizga kam — 254 million dollar ishlab topgan. Qolaversa, Anjelina Joli va Emili Blantdan boshqa aktrisalar daromadining katta qismini an’anaviy kinematografiyadan emas, striming servislari va televideniyedan qo‘lga kiritgan.

So‘nggi yilda eng ko‘p haq olgan erkak aktyorlar o‘ntaligining umumiy daromadi 545,5 million dollarni tashkil qilgan va ushbu natija ayol hamkasblar tomonidan qayd qilingan ko‘rsatkichdan deyarli ikki baravar ko‘p, deyiladi xabarda.

Eslatib o‘tamiz, Forbes’ning eng ko‘p haq to‘lanadigan aktyorlar ro‘yxatida Dueyn Jonson yetakchilik qilgan va uning 2020-yildagi daromadi 87,5 million dollar deb baholangandi.