Yevropa Ittifoqi belaruslik mansabdorlarga qarshi sanksiya e’lon qildi. Lukashenko qora ro‘yxatga kiritilmadi

Yevropa Ittifoqi yetakchilari saylovning soxtalashtirilishi va inson huquqlari buzilishi uchun javobgar bo‘lgan Belarusning rasmiy shaxslariga nisbatan sanksiyalar joriy qilishga kelishib oldi. Bu haqda Yevropa Ittifoqining Bryusselda bo‘lib o‘tgan sammitining birinchi kuni yakunlari bo‘yicha o‘tkazilgan matbuot anjumanida Yevropa kengashi rahbari Sharl Mishel ma’lum qildi, deb yozmoqda Meduza.

Kengash rahbarining so‘zlariga ko‘ra, sanksiya ro‘yxatiga taxminan 40 nafar belaruslik mansabdor kiritiladi. Belarus prezidenti Aleksandr Lukashenko esa ro‘yxatdan joy olmaydi.

Fransiya prezidenti Emmanuel Makronning tushuntirishicha, Lukashenkoni qora ro‘yxatga kiritish unga Yevropa Ittifoqining muxolifat bilan muloqot boshlash va siyosiy mahbuslarni ozod qilish haqidagi talablarini bajarishga imkon bermasligi mumkin.

Sanksiyalar 2-oktabrda, hujjat yozma shaklda e’lon qilingach kuchga kiradi.

Yevropa Ittifoqining sanksiyalariga javoban Belarus yevropalik mansabdorlarga nisbatan o‘zining sanksiyalarini joriy qildi.

Belarus Tashqi ishlar vazirligi tomonidan ta’kidlanishicha, “mavjud zamonaviy diplomatik amaliyotga” muvofiq ro‘yxat e’lon qilinmaydi.

“Belarus har doim so‘zda va amalda qarama-qarshilik tarafdori emas. Biz muloqot va tushunish tarafdorimiz. Ammo suveren davlat sifatida biz o‘z milliy manfaatlarimizni tabiiy ravishda himoya qilish uchun nodo‘stona harakatlarga afsuslanmasdan, qat’iyat bilan javob beramiz”, — deyiladi Belarus TIV xabarida.

Belarus Tashqi ishlar vazirligining ogohlantirishicha, Yevropa Ittifoqining bunday sanksiyalarni joriy qilishi yanada jiddiy oqibatlarga olib kelishi mumkin, masalan, Belarusning qo‘shma dasturlar va loyihalardan chiqib ketishi, diplomatik aloqalarni saqlash maqsadga muvofiqligi to‘g‘risida qaror qabul qilingunga qadar diplomatik mavjudlik darajasi va modalligini qayta ko‘rib chiqish.

Avvalroq Buyuk Britaniya va Kanada Aleksandr Lukashenko va uning atrofidagi kishilarga qarshi sanksiya joriy qilgandi.

Eslatib o‘tamiz, 23-sentabr kuni Aleksandr Lukashenko yashirincha inauguratsiya marosimini o‘tkazgan va rasman Belarus prezidenti lavozimida ish boshlagan. Bu esa mamlakatda noroziliklarning yangi to‘lqinini yuzaga keltirdi.

Shundan so‘ng Litva, Latviya, Estoniya, Slovakiya, Ukraina, Germaniya, Kanada, Polsha, AQSh, Shvetsiya, Norvegiya, Buyuk Britaniya va Yevropa Ittifoqi Lukashenkoni Belarusning qonuniy prezidenti sifatida tan olishdan bosh tortdi.