Belgiyaning sobiq qiroli Albert II ning noqonuniy qizi, rassom Delfin Boyel malika unvoniga ega bo‘lish huquqiga erishdi. Ushbu qaror Bryussel Apellyatsiya sudi tomonidan qabul qilindi, deb yozadi Belgiyaning VRT nashriga tayanib Meduza.
Boyelning o‘g‘li va qizi ham shahzoda va malika maqomlarini olishlari mumkin. Boyel otasi Albertning Saksen-Koburg-Gotsk familiyasi va ismiga “Hazarati oliyalari” faxriy unvonini qo‘shib aytilish huquqini ham oldi.
Bundan tashqari, u sobiq monarx merosining sakkizdan bir qismini talab qilishi mumkin.
“Sudda g‘alaba qozonish hech qachon ota mehrining o‘rnini bosolmaydi, lekin bu adolat tuyg‘usini beradi”, – deydi Boyelning advokati Mark Uyttendal.
Ma’lumot uchun, Delfin Boyel 1968-yilda Albert II va baronessa Sibilla de Selis Lonshan munosabatlari natijasida tug‘ilgan. O‘sha paytda ikkalasining ham alohida-alohida turmushi bor edi. Keng jamoatchilik ularning ishqiy munosabati haqida 1999-yildagina bilgan.
Albert II 2013-yilda taxtdan voz kechib, qonuniy daxlsizligini yo‘qotganida, Boyel unga qarshi otalikni tan olishni talab qilib sudga murojaat qilgan.
Sud 2019-yilda sobiq monarxga DNK testini topshirishni buyurdi, bu uning Boyel bilan qarindoshligini isbotladi. 2020-yil boshida Albert II nikohsiz tug‘ilgan qizini rasman tan oldi.
Izoh (0)