Европа Иттифоқи етакчилари сайловнинг сохталаштирилиши ва инсон ҳуқуқлари бузилиши учун жавобгар бўлган Беларуснинг расмий шахсларига нисбатан санкциялар жорий қилишга келишиб олди. Бу ҳақда Европа Иттифоқининг Брюсселда бўлиб ўтган саммитининг биринчи куни якунлари бўйича ўтказилган матбуот анжуманида Европа кенгаши раҳбари Шарль Мишель маълум қилди, деб ёзмоқда Meduza.
Кенгаш раҳбарининг сўзларига кўра, санкция рўйхатига тахминан 40 нафар беларуслик мансабдор киритилади. Беларусь президенти Александр Лукашенко эса рўйхатдан жой олмайди.
Франция президенти Эммануэль Макроннинг тушунтиришича, Лукашенкони қора рўйхатга киритиш унга Европа Иттифоқининг мухолифат билан мулоқот бошлаш ва сиёсий маҳбусларни озод қилиш ҳақидаги талабларини бажаришга имкон бермаслиги мумкин.
Санкциялар 2 октябрда, ҳужжат ёзма шаклда эълон қилингач кучга киради.
Европа Иттифоқининг санкцияларига жавобан Беларусь европалик мансабдорларга нисбатан ўзининг санкцияларини жорий қилди.
Беларусь Ташқи ишлар вазирлиги томонидан таъкидланишича, «мавжуд замонавий дипломатик амалиётга» мувофиқ рўйхат эълон қилинмайди.
«Беларусь ҳар доим сўзда ва амалда қарама-қаршилик тарафдори эмас. Биз мулоқот ва тушуниш тарафдоримиз. Аммо суверен давлат сифатида биз ўз миллий манфаатларимизни табиий равишда ҳимоя қилиш учун нодўстона ҳаракатларга афсусланмасдан, қатъият билан жавоб берамиз», — дейилади Беларусь ТИВ хабарида.
Беларусь Ташқи ишлар вазирлигининг огоҳлантиришича, Европа Иттифоқининг бундай санкцияларни жорий қилиши янада жиддий оқибатларга олиб келиши мумкин, масалан, Беларуснинг қўшма дастурлар ва лойиҳалардан чиқиб кетиши, дипломатик алоқаларни сақлаш мақсадга мувофиқлиги тўғрисида қарор қабул қилингунга қадар дипломатик мавжудлик даражаси ва модаллигини қайта кўриб чиқиш.
Аввалроқ Буюк Британия ва Канада Александр Лукашенко ва унинг атрофидаги кишиларга қарши санкция жорий қилганди.
Эслатиб ўтамиз, 23 сентябрь куни Александр Лукашенко яширинча инаугурация маросимини ўтказган ва расман Беларусь президенти лавозимида иш бошлаган. Бу эса мамлакатда норозиликларнинг янги тўлқинини юзага келтирди.
Шундан сўнг Литва, Латвия, Эстония, Словакия, Украина, Германия, Канада, Польша, АҚШ, Швеция, Норвегия, Буюк Британия ва Европа Иттифоқи Лукашенкони Беларуснинг қонуний президенти сифатида тан олишдан бош тортди.
Изоҳ (0)