Bu yil pandemiya sababli kunduzgi ta’lim shaklida o‘quvchi talabalarning to‘lov-kontaktiga 10 foizlik chegirma berilishi haqida xabar berilgan edi. Shu o‘rinda nega kechki va sirtqi ta’lim shakllari uchun bu imtiyoz berilmadi, degan savol tug‘iladi. Mazkur savolga Oliy ta’lim muassasalari faoliyatini muvofiqlashtirish bosh boshqarmasi boshlig‘i Abduvali Xoliqov 2020-yil 29-sentabr kuni AOKAda bo‘lib o‘tgan matbuot anjumanida javob berdi.
“Kechki va sirtqi ta’lim shakllarida yoki ikkinchi mutaxassislikda o‘qiyotgan talabalarda o‘qishdan tashqari ishlash imkoniyati mavjud. Pandemiya sharoitida asosiy muammo kunduzgi ta’lim shaklida o‘qiyotgan talabalarda kelib chiqmoqda. Biz shu toifadagi talabalarga imkoniyat yaratish maqsadida kunduzgi ta’lim shakliga 2020/2021-o‘quv yili uchun to‘lov-shartnomani 10 foizga qisqartirdik. Bundan tashqari, oliy ta’lim muassasalari tomonidan yetim, chin yetim, nogironligi bo‘lgan hamda ijtimoiy himoyaga muhtoj, ‘temir daftar’ ro‘yxatidagi oila farzandi bo‘lgan talabalarga kontrakt to‘lovlarini qoplash uchun manzilli moddiy yordam ko‘rsatiladi. Bunda oliy ta’lim muassasalari mavjud mablag‘lari hisobidan talabalarning ijtimoiy holatidan kelib chiqib, 4 million so‘mgacha moliyaviy yordam ko‘rsatish imkoniyatiga ega bo‘ladi”, – dedi Abduvali Xoliqov.
Eslatib o‘tamiz, berilayotgan ushbu imtiyozlar nodavlat oliy ta’lim muassasalari va ularning talabalariga taalluqli emas.
Mavzuga doir:
Izoh (0)