Osiyo futbol konfederatsiyasi (OFK) tartib intizom qo‘mitasi Chempionlar Ligasi 1/8 final o‘yinlari yakuniga ko‘ra bir qator qarorlar qabul qildi.
Xususan, “Paxtakor” himoyachisi Yegor Krimets “Istiqlol”ga qarshi o‘yinda (2:1) hakamning qaroriga nisbatan ishlatgan harakati uchun 5 ming dollar miqdorida jarimaga tortildi. Uning 1250 dollari keyingi uch oy ichida to‘lab berilishi belgilandi. Qolgan 3750 dollar esa shartli ravishda ikki yil muddatga qoldirildi. Agar Krimets ushbu harakatni takrorlaydigan bo‘lsa, u holda mazkur miqdor yangi jarimaga qo‘shib to‘lanadi.
Eslatib o‘tamiz, hakam “Paxtakor” darvozasi ishg‘ol etilgan vaziyatda jarima zarbasini belgilashda xatoga yo‘l qo‘ygan. Krimets esa barmoqlari bilan ishora qilib, hakamni pora olganligiga shama qilgandi.
Shuningdek, “Istiqlol”ning “Paxtakor”ga qarshi o‘yindagi hakam qaroriga nisbatan qilgan shikoyati qabul qilinmagan.
Yana bir qarorga ko‘ra, “Persepolis” o‘yinchisi Siamak Ne’matining “As-Sadd”ga qarshi o‘yindagi qizil kartochkasi bekor qilindi. Shu tariqa, u Ne’mati “Paxtakor”ga qarshi o‘yinda ishtirok etishi mumkin bo‘ladi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)